ممبئی// ممبئی انڈینس کے کوچ مارک باؤچر نے بدھ کو کہا کہ وہ انڈین پریمیئر لیگ کے آئندہ سیزن میں سرکردہ تیز گیند باز جسپریت بمراہ کی کمی محسوس کریں گے، لیکن یہ نوجوان گیند بازوں کے لیے آگے آنے کا سنہری موقع ہے۔
باؤچر نے یہاں نامہ نگاروں سے کہاکہ ”ہمارا باؤلنگ اٹیک بہت دلچسپ ہے۔ سچ پوچھیں تو بمراہ کو کھونا ہمارے لیے بہت بڑا نقصان ہے۔ جب آپ کچھ کھلاڑی کھو دیتے ہیں تو کبھی کبھی آپ کو کچھ مواقع بھی ملتے ہیں۔ گزشتہ چند سالوں میں ممبئی انڈینز جب اپنی ٹیم کا انتخاب کرتے ہیں تو وہ پہلے پرائمری الیون کا انتخاب کرتے ہیں، پھر اپنے متبادل کا انتخاب کرتے ہیں اور پھر کچھ نوجوانوں میں سرمایہ کاری کرتے ہیں۔ اب وقت آگیا ہے کہ وہ نوجوان آگے آئیں اور موقع سے فائدہ اٹھائیں۔
اہم بات یہ ہے کہ بمراہ اپنی کمر میں اسٹریس فریکچر کی وجہ سے کافی عرصے سے کرکٹ سے دور ہیں اور حال ہی میں نیوزی لینڈ میں سرجری کروانے کے بعد آئی پی ایل میں حصہ نہیں لے سکیں گے۔ بمراہ گزشتہ برسوں سے ممبئی کے سرکردہ بولر رہے ہیں اور ان کی غیر موجودگی کا مطلب ہے کہ جوفرا آرچر بولنگ اٹیک کی قیادت کر سکتے ہیں۔ تاہم، آرچر خود بھی کمر کی سرجری کے بعد کچھ عرصے پہلے ہی کرکٹ میں واپس آئے ہیں اور باؤچر اسے جلدی نہیں کرنا چاہتے۔
باؤچر نے کہاکہ “بین الاقوامی کھلاڑیوں کے بارے میں سب سے اہم بات یہ ہے کہ انہیں کچھ آزادی کی ضرورت ہے۔ یہ سب مسلسل کرکٹ کھیل رہے ہیں۔ جوفرا بڑی چوٹ سے واپس آ رہے ہیں۔ وہ حال ہی میں کافی کرکٹ کھیل رہے ہیں جو کہ اچھی بات ہے۔ وہ میدان میں جا کر پرفارم کرنے کے لیے تیار ہے۔ ہم دیکھیں گے کہ وہ آج رات (عملی طور پر) کیسا پرفارم کرتا ہے۔”
آرچر کے علاوہ ممبئی کے پاس جیسن بہرنڈورف، ڈوین جانسن اور کیمرون گرین جیسے آپشنز بھی ہیں، حالانکہ کوچ باؤچر ہندوستانی ٹیلنٹ پر نظر رکھے ہوئے ہیں۔
