نجم سیٹھی پی ایس ایل کا فائنل دیکھنے کے بعد دبئی جائیں گے

کراچی//
پاکستان کرکٹ بورڈ کی مینجمنٹ کمیٹی کے چیئرمین نجم سیٹھی پی ایس ایل کا فائنل دیکھنے کے بعد دبئی جائیں گے۔
ذرائع کے مطابق نجم سیٹھی کو آئی سی سی اور اے سی سی کے اجلاسوں میں شرکت کرنی ہے جس کے لیے وہ 19 مارچ کی صبح دبئی روانہ ہوں گے۔
انٹرنیشنل کرکٹ کونسل کا اجلاس 18 سے 20 مارچ تک دبئی میں شیڈول ہے جبکہ ایشین کرکٹ کونسل ایگزیکٹو کا اجلاس 21 مارچ کو دبئی میں ہوگا۔
پاکستان کرکٹ بورڈ کے چیف ایگزیکٹو فیصل حسنین اور سی او او سلمان نصیر آج دبئی روانہ ہو رہے ہیں۔
ذرائع کے مطابق آئی سی سی میٹنگز میں پاکستان چیمپئنز ٹرافی کے حوالے سے تفصیلی بریفنگ دے گا جبکہ اے سی سی اجلاس میں پاکستان ایشیا کپ کی میزبانی کے حوالے سے سخت مؤقف اپنائے گا۔
ذرائع کا کہنا ہے کہ اے سی سی کا اجلاس ایشیا کپ کی میزبانی کے حوالے سے بہت اہم ہے۔