یہ زلمے خلیل زاد بھی احمق ہی نکلے … اور ہاں بے وقوف بھی ۔ چلے تھے اُس قوم‘ اُس ملک کو مشورہ دینے ‘ جس قوم اور ملک نے خود کو تباہ و برباد کرنے کی قسم کھائی ہے… خود سے عہد کر لیا ہے ۔زلمے خلیل زاد‘ افغانستان پر امریکہ کے مذاکراتکار رہے ہیں… اور اس ناطے انہیں پاکستان کے بارے میں بھی جانکاری ہے… اس ملک کا اندرون و بیرون یہ اچھی طرح جانتے ہیں… اسی لئے انہوں نے پاکستان کو مشورہ دیا کہ وہ اپنے حالات سدھارنے پر توجہ دے… کہ… کہ ان کے مطابق اس ملک کو سیاسی ‘ اقتصادی اور سکیورٹی … یعنی ایک ساتھ تین تین بحرانوں کا سامنا ہے… لیکن… لیکن جب آپ کسی جاہل کو آئینہ دکھائیں گے یا دکھانے کی کوشش کریں گے تو… تو وہ جاہل بپھر جاتا ہے … سو پاکستان بھی بپھر گیا… ان کے مشورے کو بن مانگا قرار دیا اور… اور اس لئے قرار دیا کیونکہ خلیل زاد نے اس ملک کو آئینہ دکھانے کی احمقانہ کوشش کی تھی… احمقانہ اس لئے کہ… کہ یہ ملک خود اپنا دشمن بن بیٹھا ہے… اس کا کوئی اور دشمن نہیں ہے… یاآپ یوں بھی کہہ سکتے ہیں کہ اس ملک کو کسی دشمن کی ضرورت نہیں ہے… اور بالکل بھی نہیں ہے ۔اس ملک میں عدلیہ کا احترام نہیں کیا جارہا ہے… یقینا بہت سارے ممالک میں بھی عدلیہ کے احکامات کا احترام نہیں کیا جاتا ہے… لیکن جب کسی ملک کا سابق وزیر اعظم عدالتی احکامات کی کھلم کھلا خلاف ورزی کرے… جیسا کہ خان صاحب… عمراب خان صاحب کررہے ہیں تو… تو اس ملک کا خدا ہی حافظ ہے ۔نہیں صاحب !بات صرف عمران خان کی نہیں اور… اور بالکل بھی نہیں ہے… اس ملک کے سبھی سیاستدان ایک جیسے ہیں‘ جنہوں نے اپنے ذاتی مفادات اور اقتدار کیلئے ملک کے ادارو ں کو ایک دوسرے کے خلاف کھڑا کیا ‘ انہیں آپس میں لڑوا دیا… ان کی ساکھ کو نقصان پہنچایا اور… اور ہاں یہ ادارے خود بھی دودھ کے دھلے ہو ئے نہیںہیں… اور بالکل بھی نہیں ہیں…کرسی پر بیٹھ کر ان کے سربراہان نے آئینی اور انصاف کے تقاضوں کو پورا نہیں کیا … بالکل بھی نہیں کیا… بلکہ ایسے احکامات اور فیصلے کئے جس سے اس ملک کا بیڑا غرق ہو گیا ہے… پھر چاہے وہ ایوان صدر ہو‘اس ملک کی عدلیہ یا پھر فوج ۔سبھی نے مل کر ملک کو سیاسی ‘ معاشی ‘ سماجی اور سکیورٹی بحران میں دھکیل دیا اور… اور جب اسی بات کی نشاندہی زلمے خلیل زاد نے کی تو… تو اسے خاموش رہنے کا مشورہ دیا گیااور… اور اس لئے دیاگیا کیونکہ اس نے جاہل کو آئینہ دکھانے کی حماقت کی تھی اور… اور سو فیصد کی تھی ۔ ہے نا؟
جاہل کو آئینہ دکھانے کی حماقت
