نئی دہلی/16 مارچ
نیشنل کانفرنس‘ پیپلز ڈیموکریٹک پارٹی اور کانگریس کے ایک وفد نے جموں و کشمیر میں انتخابات کا مطالبہ کرنے کے لیے الیکشن کمیشن آف انڈیا سے ملاقات کی۔
بزرگ رہنما محبوبہ مفتی، فاروق عبداللہ، پرمود تیواری، اور نصیر حسین وفد کا حصہ ہوں گے۔
میٹنگ کے بعد، نیشنل کانفرنس کے رہنما فاروق عبداللہ نے کہا کہ انتخابی کمیشن نے اس معاملے پر غور کرنے کی یقین دہانی کرائی ہے اور مزید کہا”یہ بدقسمتی کی بات ہے کہ ایک ایسی ریاست جو ہندوستان کا تاج ہے، کو یونین ٹیریٹری بنا دیا گیا۔ ہم جموں و کشمیر میں جمہوری حکومت چاہتے ہیں“۔
میٹنگ سے پہلے، نامہ نگاروں سے بات کرتے ہوئے فاروق عبداللہ نے کہا کہ جموں و کشمیر کی 13 جماعتوں نے آج یہاں میٹنگ کی اور اس بات پر اتفاق کیا کہ جموں و کشمیر کی ریاستی حیثیت کو بحال کیا جانا چاہئے۔
نیشنل کانفرنس کے صدر نے مزید کہا ”ہم سب اس مسئلہ پر اکٹھے ہیں کہ جب حالات معمول پر آچکے ہیں تو جموں و کشمیر میں انتخابات کیوں نہیں کرائے جارہے ہیں“۔
نیشنلسٹ کانگریس پارٹی کے سربراہ شرد پوار نے بھی کہا کہ وہ جموں و کشمیر کی ریاستی حیثیت کی بحالی کے معاملے پر متفق ہو گئے ہیں۔ پوار نے قومی راجدھانی میں نامہ نگاروں کو بتایا، ”ہم سب جموں کشمیر کے لوگوں کا درد بانٹنے اور انہیں یقین دلانے کے لیے سری نگر کا دورہ کرنے کے لیے تیار ہیں۔“