اڈانی گھوٹالے پر مودی اور بی جے پی خاموش کیوں ہیں؟:ناناپٹولے

ممبئی//:مرکز کی نریندر مودی حکومت کاصنعتکار اڈانی پر خاص احسان ہے اور یہی وجہ ہے کہ اسٹیٹ بینک آف انڈیا (SBI) اور لائف انشورنس کارپوریشن (LIC) میں جمع عام لوگوں کے کروڑوں روپے من مانے طریقے سے اڈانی کی کمپنیوں کو دے دیے گئے ہیں۔ اب جبکہ اڈانی گروپ میں مالی گھپلے کا پردہ فاش ہو چکا ہے تو عوام کی محنت کی کمائی کے ڈوب جانے کا خطرہ لاحق پیدا ہوگیا ہے ۔سوال یہ پیدا ہوتا ہے کہ اڈانی گھوٹالے کے معاملے پر وزیر اعظم نریندر مودی اور بی جے پی کیوں خاموش ہیں؟ عوام کے مفاد ات کے تحفظ اور اڈانی کی بدعنوانی کے خلاف 13؍مارچ کو مہاراشٹر کانگریس راج بھون کا گھیراؤ کرے گی۔یہ اطلاع آج یہاں مہاراشٹر پردیش کانگریس کمیٹی کے صدر ناناپٹولے نے دی ہے ۔
اس ضمن میں مزید بات کرتے ہوئے نانا پٹولے نے کہا کہ مودی کی آمرانہ حکومت کی وجہ سے ملک معاشی بحران سے گزر رہا ہے ۔ اڈانی کو عام لوگوں کے کروڑوں روپے دے کر مودی حکومت نے انہیں مالی بحران میں مبتلا کردیا ہے ۔ کانگریس کے رکن پارلیمنٹ اور پارٹی کے سابق صدر راہل گاندھی نے پہلے ہی خدشہ ظاہر کیا تھا کہ اڈانی کا بلبلہ جلد ہی پھوٹ جائے گا، لیکن مودی حکومت اڈانی کو پرموٹ کرنے میں مصروف رہی۔سچائی یہ ہے کہ مودی اپوزیشن پارٹیوں کی کبھی نہیں سنتے ۔ آخرکار اڈانی کا بلبلہ پھوٹ گیا اور لوگوں کے کروڑ روپئے ڈوب گئے ۔پٹولے نے کہا کہ کانگریس پارٹی نے اس گھوٹالے کی تحقیقات کے لیے پارلیمنٹ میں مشترکہ پارلیمانی کمیٹی (جے پی سی) کی تشکیل کا مطالبہ کیا، لیکن مودی حکومت نے اس گھوٹالے پر ایک لفظ بھی نہیں بولا۔ مودی حکومت بدعنوان اڈانی کی حمایت کر رہی ہے ۔ ای ڈی نے ریاست میں دو دنوں میں سابق وزراء حسن مشرف اور سدانند کدم کے خلاف کارروائی کی ہے ۔ ای ڈی تیسری بار مشرف کے خلاف کارروائی کر رہی ہے لیکن اس ای ڈی کو بی جے پی کے بدعنوان لیڈر نظر نہیں آتے ۔ بی جے پی حکومت اپوزیشن لیڈروں کے خلاف ای ڈی، سی بی آئی اور محکمہ انکم ٹیکس کی جانچ کر رہی ہے ، لیکن بڑا سوال یہ ہے کہ اڈانی اس گھوٹالے کی جانچ کیوں نہیں کر رہے ہیں؟ کانگریس کے ریاستی صدر نے کہا کہ بھلے ہی بی جے پی حکومت اڈانی گھوٹالے پر خاموش رہے ، لیکن کانگریس نے عوام کے مفاد میں آواز اٹھائی ہے اور اسی کے تحت راج بھون پر احتجاجی مارچ نکالا جا رہا ہے ۔
واضح رہے کہ کانگریس کے ریاستی صدر نانا پٹولے کی قیادت میں پیر 13؍ مارچ کو سہ پہر 3 بجے گرگام چوپاٹی سے راج بھون تک مارچ نکالا جائے گا اور راج بھون کا گھیراؤ کیا جائے گا۔اس مارچ میں کانگریس لیجسلیچر پارٹی کے لیڈر بالاصاحب تھورات، سابق وزیر اعلیٰ اشوک چوہان، پرتھوی راج چوہان، ریاستی ورکنگ صدر و سابق وزیر نسیم خان، چندرکانت ہنڈورے ، بسوراج پاٹل، پرنیتی شندے ، کنال پاٹل، کانگریس پارٹی کے سینئر لیڈران، سابق وزرائ، اراکین پارلیمنٹ واسمبلی نیز اہم عہدیداران و کارکنان بڑی تعداد میں شرکت کریں گے ۔