’ صحت کے ۳۵۰ نئے منصوبے شروع ہو نے والے ہیں‘

جموں/نئی دہلی//
لیفٹیننٹ گورنر ‘منوج سنہا نے منگل کو کہا کہ جموں کشمیر میں صحت کے ۳۵۰ نئے منصوبوں پر کام شروع ہو نے والا ہے ۔
سنہا نے آج جی ایم سی جموں میں پردھان منتری بھارتیہ جَن او شدھی پریوجنا کے تحت ۵ویں جَن اوشدھی دیوس کی تقریبات سے بذریعہ ورچیول موڈ خطاب کررہے تھے۔
لیفٹیننٹ گورنر نے جموں وکشمیر کے لوگوں کے لئے معیاری ، سستی اور قابل رَسائی ہیلتھ کیئر کو یقینی بنانے کے لئے متعارف کی گئی اِصلاحات پر روشنی ڈالی۔
سنہا نے کہا’’ وزیر اعظم نریندر مودی جی کی رہنمائی میں ہم صحت شعبے کو مضبوط کر رہے ہیں تاکہ سب کی بھلائی کو یقینی بنایا جاسکے۔ہمارا سب سے بڑا اَثاثہ شہریوں کی صحت ہے ۔ صحت نظام اور مضبوط سماجی و اِقتصادی ترقی کے لئے جموںوکشمیر یوٹی میں تقریباً ۳۵۰ جدید صحت کے بنیادی ڈھانچے کے منصوبے آرہے ہیں۔‘‘
ایل جی نے کہا کہ جی ڈی پی جیسے روایتی اِقتصادی میٹرک سے ہمیں لوگوں کی مجموعی صحت او رخوشی پر بھی توجہ دینی چاہیے۔اُنہوں نے کہا کہ صحت مند اور خوشحال معاشرہ معاشی فوائد او رہمہ گیر ترقی کو ممکن بنا سکتا ہے ۔
لیفٹیننٹ گورنر نے کہا کہ جن اوشدھی کیندروں سے سستی اَدویات کے نتیجے میں ملک بھر کے کنبوں کیلئے بھاری رقم کی بچت ہوئی ہے ۔اُنہوں نے کہا کہ تقریباً۳۲ہزار مریض ہر روز جموںوکشمیر یوٹی میں ۲۲۷کیندروں پر جاتے ہیں۔
سنہا نے اِس موقعہ پر تمام شراکت داروں کو مبارک باد دیتے ہوئے عوام میں عام اَدویات کو مقبول بنانے اور پردھان منتری بھارتیہ جن اوشدھی پریوجنا کے فوائد کو جموںوکشمیر یوٹی کے کونے کونے تک پہنچانے کیلئے اِجتماعی کوششیں کرنے پر زور دیا۔
ایل جی نے کہا کہ یہ سکیم معیاری ، سستی جنرل اَدویات کو عام لوگوں تک پہنچانے کے علاوہ خواتین اور نوجوانوں کو خود روزگار کا بہترین موقع فراہم کر رہی ہے۔اُنہوں نے نوٹ کیا’’ ہماری کوشش ہے کہ اَمرت کال کو نشان زد کرنے کیلئے ہر ضلع میں۷۵ جَن اوشدھی کیندر شروع کئے جائیں۔‘‘
جموںوکشمیر میں جَن اوشدھی دیوس کی یاد میں ہفتہ بھر کی تقریبات کا اہتمام کیا گیا ہے ۔
جن اوشدھی کیندر اور دیگر شراکت داروں کو جنرل اَدویات اور ماہواری صحت اور حفظان صحت کو فروغ دینے میں ان کے تعاون کے لئے مبارک باد دی گئی ۔
اِس موقعہ پر اِنتظامی سیکرٹری محکمہ صحت و طبی تعلیم بھوپندر کمار، پرنسپل جی ایم سی جموں ڈاکٹر ششی سودن شرما،پی ایم بی جے پی کے نوڈل آفیسر اور دیگر سینئر اَفسران موجو د تھے۔