سرینگر//
صوبائی انتظامیہ کاکہنا ہے کہ سرینگر میں سمارٹ سٹی کے تحت پروجیکٹوں پر جاری کام کی وجہ سے اسکولوں کے اوقات کار بدل دئے گئے ہیں ۔
صوبائی کمشنر کشمیر‘وجے کمار بدھوری آج کشمیر سے کنیا کماری تک سائیکل ریس کو بخشی اسٹیڈیم سے ہری جھنڈی دکھا کر روانہ کرنے کے موقع پر ذرائع ابلاغ کے نمائندوں سے بات چیت کررہے تھے۔
سرمائی تعطیلات کے بعد اسکول دوبارہ کھلنے کے بارے میں پوچھے جانے پر بدھوری نے کہا کہ اسکولوں کے کھلنے کیلئے تمام تر تیاریاں کی گئی ہیں۔انہوں نے کہا کہ اسکول ٹائمنگ میں تبدیلی کی گئی ہے تاکہ سمارٹ سٹی کے پیش نظر جو کئی کام چل رہے ہیں‘اس سے ٹریفک جام کا مسئلہ پیش نہ آسکے ۔
پراپرٹی ٹیکس کے بارے میں پوچھے جانے پر ان کا کہنا تھا کہ دیہی علاقوں اور زرعی اراضی پر پراپرٹی ٹیکس لاگو نہیں ہے ۔
بدھوری نے میڈیا کے ساتھ بات کرتے ہوئے کہا کہ آج کی جو یہ ریس ہے یہ دکھاتی ہے کہ اس کے لئے بہت زیادہ جذبہ در کار ہے ۔انہوں نے کہا کہ اگر جذبہ موجود ہے تو کچھ کیا جا سکتا ہے ۔
صوبائی کمشنر نے کہا کہ جموں وکشمیر کے نوجوان سپورٹس میں بہت بہت آگے ہیں۔انہوں نے کہا کہ سپورٹس کے مختلف شعبوں میں اپنا نام کمایا جاسکتا ہے ۔
بدھوری کا کہنا تھا کہ ہمارے سپورٹس کونسل بہت ہی سرگرم ہے اور تمام پنچایتوں میں کھیل کے میدان بنائے گئے ہیں اگر کہیں نہیں بنا تو مجھے اس کے بارے میں مطلع کیا جائے ۔