وہ دن دور نہیں جب لوگ ہندوستان میں بنے ہوائی جہاز میں سفر کریں گے :وزیر اعظم مودی

نئی دہلی/بنگلورو//
وزیر اعظم نریندر مودی نے پیر کو کہا کہ آج ہندوستان کی ہوابازی کا بازار پوری دنیا میں عروج پر ہے اور وہ دن دور نہیں جب یہاں کے لوگ دیسی ساختہ طیاروں میں ہی سفر کررہے ہوں گے ۔
کرناٹک کے شیوموگا میں نئے ہوائی اڈے کا افتتاح کرنے کے بعد ایک اجتماع سے خطاب کرتے ہوئے مودی نے کانگریس کی قیادت والی پچھلی حکومتوں پر ملک کے ہوابازی کے شعبے کو چند شہروں تک محدود رکھنے کا الزام لگایا اور کہا کہ ان کی حکومت نے اب صورتحال بدل دی ہے ۔انہوں نے کہا ’’ آج نو برسوں میں ہوائی اڈوں کی تعداد دوگنی ہو گئی ہے اور عام آدمی بھی سستی پروازوں کا فائدہ اٹھا رہا ہے ‘‘۔
بوئنگ اور ایئربس سے سینکڑوں نئے طیارے خریدنے کے ایئر انڈیا کے سودے کا حوالہ دیتے ہوئے وزیر اعظم نے کہا کہ ہندوستان کی ہوا بازی بازار کا ڈنکا پوری دنیا میں بج رہا ہے ۔ انہوں نے کانگریس کی قیادت والی پچھلی حکومتوں پر صرف چند بڑے شہروں تک ہوائی رابطے کو محدود کرنے اور حکومت کے زیر کنٹرول ایئر انڈیا کو نقصانات اور اس طرح کے دیگر منفی اثرات کی باتوں کیلئے ہی خبروں میں رہتی تھیں۔
وزیر اعظم نے کہا کہ کانگریس کی ریاست میں ایئر انڈیا کی بات صرف منفی باتوں کیلئے کی جاتی تھی، آج اس کا دنیا کے ہوابازی کے شعبے میں نئی بلندیوں کی طرف بڑھنے کا تذکرہ ہے ۔
مودی نے کہا کہ ایئر انڈیا جو نیا طیارہ لے رہی ہے اس پر ہندوستان کے ہزاروں نوجوانوں سے بات چیت کی جائے گی۔
یہ بات قابل ذکر ہے کہ اس ماہ ایئر انڈیا نے امریکہ کی بوئنگ کمپنی اور یورپی طیارہ ساز کمپنی ایئربس سے ۷۰؍ارب ڈالر کے۴۷۰طیارے خریدنے کا معاہدہ کیا ہے ۔ ان کیلئے اسے عملے کے پانچ ہزار سے زائد ارکان کی ضرورت ہوگی۔
مودی نے کہا کہ آج بھی یہ طیارے بیرون ملک سے خریدے جا رہے ہیں، لیکن وہ دن دور نہیں جب ہندوستان کے شہری میڈ ان انڈیا طیاروں میں سفر کریں گے ۔
وزیر اعظم نے کہا کہ کانگریس کے دور میں صرف بڑے شہروں میں ہوائی اڈوں پر توجہ دی جاتی تھی‘ چھوٹے شہروں کو بھی ہوائی راستے سے جوڑا جائے ، یہ کانگریس کی سوچ میں نہیں تھا۔ انہوں نے کہا’’غریبوں کیلئے کام کرنے والی بی جے پی حکومت نے حالات کو بدلنے کا فیصلہ کیا ہے ۔ ہم نے فیصلہ کیا کہ چپل پہنے ہوئے شخص کو بھی ہوائی سفر کرنے کے قابل ہونا چاہیے ۔ اسی لیے ہم نے بہت کم قیمتوں پر ٹکٹ پیش کرنے کیلئے اڑان اسکیم شروع کی‘‘۔
مودی نے کہا کہ اب پہلی بار عام آدمی بھی ملک میں ہوائی سفر کر رہا ہے اور نئے ہوائی اڈے کے ساتھ شیوموگا بھی اس کا شاہد بنے گا۔ شیوموگا ہوائی اڈہ قدرتی حسن کے اس علاقے میں ترقی کے نئے امکانات کھولے گا۔
وزیر اعظم نے ہندوستان میں ہوا بازی کے شعبے کی ترقی ہندوستان کی پالیسیوں کی وجہ سے ہے ۔ ان کی حکومت بننے سے پہلے ملک میں۷۴ہوائی اڈے تھے ، بی جے پی حکومت نو برسوں میں مزید۷۴ہوائی اڈے بناچکی ہے ۔
وزیر اعظم نے شیوموگا میں نئے ہوائی اڈے کا افتتاح کرنے کے علاوہ ۳۶۰۰کروڑ روپے سے زیادہ کے مختلف ترقیاتی پروجیکٹوں کا افتتاح اور سنگ بنیاد رکھا۔