نئی دہلی//
کانگریس نے کہا ہے کہ جموں کشمیر میں پنڈتوں کو لگاتار مارا جا رہا ہے‘ لیکن مودی حکومت اس معاملے میں کوئی ٹھوس قدم اٹھانے کے بجائے آنکھیں بند کر کے بیٹھی ہے ۔
کانگریس نے اپنے آفیشل ٹویٹر ہینڈل پر کہا ’’کشمیر میں ایک اور کشمیری پنڈت سنجے شرما کا قتل کر دیا گیا۔ کشمیری پنڈتوں کو وادی میں مسلسل قتل کیا جا رہا ہے اور مودی سرکار آنکھیں بند کیے بیٹھی ہے ۔ یہ حکومت کشمیری پنڈتوں کو تحفظ فراہم کرنے میں ناکام رہی اور جب انہوں نے سیکورٹی کا مطالبہ کیا تو انہیں مختلف طریقوں سے ہراساں بھی کیا‘‘۔
پارٹی نے مزید کہا کہ ایک طرف کشمیری پنڈتوں کو مارا جا رہا ہے تو دوسری طرف مودی حکومت ان پر تشدد کر رہی ہے ۔
کانگریس نے کہا ’’وادی میں کام کرنے والے کشمیری پنڈتوں نے جب حکومت سے تحفظ کا مطالبہ کیا تو ان کی تنخواہیں روک دی گئیں۔ مودی سرکار کا ایجنڈا واضح ہے ‘ آواز اٹھاؤ گے تو کچل دیئے جاؤگے ۔‘‘