کے اے ایس آفیسر، لیکچرار رشوت لیتے ہوئے گرفتار:سی بی آئی

جموں//
جموں کشمیر کی سرمائی راجدھانی جموں میں سی بی آئی نے کے اے ایس آفیسر اور لیکچرار کو رشوت لیتے ہوئے رنگے ہاتھوں دھر دبوچ کر سلاخوں کے پیچھے دھکیل دیا۔
سرکاری ذرائع نے بتایا کہ سینٹرل بیورو آف انوسٹی گیشن (سی بی آئی ) نے بدھ کے روز جموں وکشمیر ٹورازم ڈیلوپمنٹ کارپوریشن کے چیف اکاونٹس آفیسر (کے اے ایس) اور گورنمنٹ پال ٹیکنک کالج کے لیکچرار کو۳ء۲لاکھ روپے کی رشوت لیتے ہوئے رنگے ہاتھوں گرفتار کیا۔
ذرائع نے کہاکہ ایک شخص نے سی بی آئی میں شکایت درج کی کہ چیف اکاونٹس آفیسر لیکچرار کے ذریعے شکایت کنندہ سے کام نپٹانے کی خاطر۳ء۲لاکھ روپیہ کی رشوت کا تقاضہ کر رہا ہے ۔
اُن کے مطابق سی بی آئی نے جال بچھایا جس دوران ملزم کو شکایت کنندہ سے۳ء۲لاکھ روپیہ کی رقم لیتے ہوئے رنگے ہاتھوں دھر دبوچ کر سلاخوں کے پیچھے دھکیل دیا۔
دونوں ملزمان کے سرکاری اور رہائشی مکانوں کی تلاشیاں بھی لی گئیں۔سی بی آئی ذرائع نے گرفتار شدگان کی شناخت چیف اکاونٹس آفیسر سجاد احمد اور لیکچرار شوکت علی کے طورپر کی ہے ۔انہوں نے بتایا کہ دونوں کو عدالت مجاز میں پیش کرکے وہاں سے اُن کی ریمانڈ حاصل کی جائے گی۔