’عمر،محبوبہ اور سجاد کے پالتو جانور بھی برگر اور پیز کھاتے ہیں‘

سرینگر//
’’عمر عبداللہ اور محبوبہ مفتی کو غریبی کا کیا پتہ ہے جن کے گھروں میں جانور‘کتے۔بلی برگر اور پیزا کھاتے ہیں۔ انہیں غریبی کا کیا پتہ اور انہیں آج غریب کیوں یاد آرہے ہیں‘‘۔
ان باتوں کا اظہار بھارتیہ جنتا پارٹی(بی جے پی) کے جنرل سکریٹری سنیل شرما نے ہندوارہ میں ایک ورکراس مٹینگ کے دوران میڈیا نمائندوں کے ساتھ بات کرتے ہوئے کہا۔
شرما نے میڈیا کے سوالوں کے جواب دیتے ہوئے کہا کہ محبوبہ مفتی،عمر عبداللہ اور سجاد غنی لون جیسے لیڈران آج غریبی کو لیکر کیوں اتنی بیان بازی کررہے ہیں انہیں کیا پتہ غریبی کیا ہے۔ انہوںنے کہا ’’ غریبی بھارت کے وزیر اعظم نریندری مودی کو پتہ ہے جس کی ماں دوسروں کے گھروں میں کام کرتی تھی‘ برتن دھوتی تھی‘ غریبی اس کو پتہ ہے جو خود چائے بیچ رہا تھا اور اپنا گھر چلاتا تھا‘‘۔
بی جے پی لیڈر نے کہا کہ محبوبہ مفتی،عمر عبداللہ اور سجاد غنی لون کو غریبی کا کیا پتہ جن کی کشمیر سے لندن تک پراپٹری بنی ہوئی ہے ۔جو لندن اور دیگر شہروں میں گھومتے پھرتے ہیں ۔ان لوگوں کو غریبی کا کیا معلوم جن کے گھر میں کتے ‘بلیاںبرگر اور پیزا کھاتے ہیں۔
شرمانے کہا’’ اب انہی لوگوں کی ہڑپ کی ہوئی زمین چھڑائی جارہی ہے‘ اس پر بلڈوزر چلایا جارہا ہے تو غلط کیا ہے۔ ان لیڈروں نے اپنے دور حکومت میں کئی کئی کنال سرکاری زمین ہڑپ لی ہے‘ ان پر بلڈوزر چلانا کون سا گناہ ہے۔‘‘