سدھرامیں ہوئے انکاؤنٹر میں مجسٹریل جانچ کرانے کے احکامات

جموں//
جموںکشمیر حکومت نے سال گذشتہ کے ماہ دسمبر میں سدھرا علاقے میں ہوئے انکاؤنٹر میں مجسٹریل جانچ کرانے کے احکامات صادر کئے ہیں۔
ایڈیشنل ضلع مجسٹریٹ جموں کے ایک حکمنامے کے مطابق اس انکاؤنٹر کی مجسٹریل جانچ کرنے کیلئے اسسٹنٹ کمشنر جموں پیوش دھوترا کو انکوائری افسر مقرر کیا گیا ہے ۔
اسسٹنٹ کمشنر نے اپنی ایک نوٹس میں کہا’’مجھے مجسٹریل انکوائری کرنے اور ضلع مجسٹریٹ جموں کے سامنے رپورٹ پیش کرنے کی ہدایت دی گئی ہے ‘‘۔
انہوں نے کہا’’اس معاملے کے متعلق حقائق جمع کرنے اور صاف و شفاف طریقے سے انکوائری کا عمل انجام دینے کیلئے کوئی بھی شخص جس کے پاس کوئی معلومات ہوں‘۲۱جنوری تک میرے دفتر میں میں آکر اپنا بیان ریکارڈ کرا سکتا ہے ‘‘۔
بتادیں کہ جموں کے سدھرا علاقے میں سال گذشتہ کے ۲۸دسمبر کی صبح سیکورٹی فورسز اور ملی ٹینٹوں کے مابین تصادم آرائی کے دوران چار جنگجو مارے گئے تھے اور ان کی تحویل سے اسلحہ و گولہ بارود بر آمد کیا گیا تھا۔
ایڈیشنل ڈائریکٹر جنرل آف پولیس جموں کے ٹویٹر ہینڈل پر ایک ٹویٹ میں اس انکاؤنٹر کے متعلق ایک اپ ڈیٹ میں کہا گیا تھا کہ جموں کے سدھرا علاقے میں چار جنگجو مارے گئے ۔
ٹویٹ کے مطابق ہلاک شدگان کی تحویل سے اسلحہ و گولہ بارود بر آمد کیا گیا جس میں ۷؍اے کے۴۷رائفلیں، ایک ایم فور رائفل اور تین پستول شامل ہیں۔