کہتے ہیں کہ جھوٹ کے پاؤں نہیں ہو تے ہیں … اس لئے یہ زیادہ دیر تک کھڑا نہیں رہتا ہے اور … اور منہ کے بل گر جاتا ہے ۔اور جب ہم خان صاحب… عمران خان صاحب اور ان کی پارٹی کے جھوٹوںپر نظر ڈالتے ہیں تو… تو اللہ میاں کی قسم ہمیں اس بات پر اور زیادہ یقین ہو جاتا ہے کہ واقعی میں جھوٹ کے پاؤں نہیں ہو تے ہیں اور بالکل بھی نہیں ہوتے ہیں۔وہ کیا ہے کہ خان صاحب نے ابھی جھوٹ بولا نہیں ہو تا ہے ‘ اور اس کے اس جھوٹ کو پکڑا جاتا ہے۔ تازہ جھوٹ … خان صاحب اور ان کی جماعت کا تازہ جھوٹ بھارت کے وزیر اعظم مودی کے پاکستان کے بارے میں ایک بیان کے بارے میں ہے ۔ یہ بیان مودی جی نے ۲۰۱۹ کے لوک سبھا انتخابات کے دوران دیا تھا ‘ جس میں انہوں نے کہا تھا کہ ان کی حکومت نے پاکستان کے غرور کو تباہ کیا، انہیں بھیک مانگنے کے لیے پوری دنیا میں ہاتھ پھیلانے پر مجبور کیا۔ عمران خان اور ان کی جماعت نے وزیر اعظم مودی کی اس ویڈیو کلپ کی خوب تشہیر کی … پاکستان کے موجودہ وزیر اعظم شہباز شریف کو نشانہ بنانے کیلئے اس کی تشہیر کی کہ دیکھو ’امپورٹیڈ‘ حکومت نے ملک اور اس کی معیشت کا کیا حال بے حال کیا ہے کہ مودی بھی اب طعنہ دے رہا ہے… لیکن… لیکن صاحب آج کے دور میں جھوٹ بولنا بھی اتنا آسان کہاں کہ اسے فوراً پکڑا جاتا ہے اور… اور خان صاحب اور ا ن کی پارٹی کا یہ جھوٹ بھی پکڑا گیا ۔انٹرنیٹ صارفین نے خان صاحب کا کان پکڑ کر انہیں یاد دلایا کہ جناب جس دور کی یہ ویڈیو کلپ ہے‘ جس دور کا یہ بیان ہے… اُس دور میں شبہاز شریف نہیں بلکہ آپ پاکستان کے وزیر اعظم تھے… آپ نے ملک کی معیشت کا بیڑا غرق کردیا تھا ‘ آپ کے تکبر کومودی جی نے چکنا چور کردیا تھا … آپ کے گھمنڈ کو وزیر اعظم مودی نے پاؤں سے روند دیا تھا اور… اور آپ ہیں کہ آپ جھوٹ کا سہارا لے کر اس کا ملبہ وزیر اعظم شہبازشریف پر گراناچاہتا ہے … لیکن صاحب یقین کیجئے کہ خان صاحب کو کوئی فرق پڑنے والا نہیں ہے اور … اور بالکل بھی نہیں ہے کیونکہ جس طرح عادی مجرم ہو تے ہیں … بالکل اسی طرح خان صاحب عادی جھوٹا ہے… یہ ایسی عادت ہے جس سے خان صاحب پیچھا نہیں چھڑا سکتے ہیں اور… اور اس لئے نہیں سکتے ہیں کیونکہ ان کی سیاست کی عمارت جھوٹ پر ہی قائم ہے‘اس کی بنیادیں بھی جھوٹ پر ڈالی گئی ہیں ‘ اس کاڈھانچہ اور چھت بھی جھوٹ کا ہی ہے … سچ کا نہیں ‘ بالکل بھی نہیں ۔ہے نا؟
