بلاول بٹھو کا وزیر اعظم مودی کیخلاف بیان پرسرینگر میں بی جے پی کا احتجاج

سرینگر///
بی جے پی کی جموں کشمیر یونٹ نے ہفتہ کو یہاں پاکستان کے وزیر خارجہ بلاول بھٹو کے وزیر اعظم نریندر مودی کے بارے میں ان کے ذاتی تبصرے کے خلاف احتجاج کیا۔
بی جے پی کارکنوں نے بھٹو کے خلاف نعرے لگائے اور ان سے معافی مانگنے کا مطالبہ کیا۔ یہاں جواہر نگر علاقہ میں پارٹی دفتر سے احتجاجی مظاہرہ کیا گیا۔ ’’یہ مارچ ہمارے پیارے وزیر اعظم کے خلاف بھٹو کے بے شرمانہ تبصروں کے خلاف بی جے پی کے ملک گیر احتجاج کا حصہ ہے‘‘۔
پارٹی کے کشمیر میڈیا انچارج منظور احمد نے صحافیوں کو بتایا کہ یہ احتجاج پاکستان کے خلاف ہے جو ایک دہشت گرد ریاست ہے۔ انہوں نے کہا کہ جب تک بھٹو معافی نہیں مانگتے احتجاج جاری رہے گا۔ ’’یہ پاکستان حکومت کے خلاف احتجاج ہے‘‘۔
میڈیا انچارج نے کہا’’ہم بھٹو کو پھانسی دینے کی اپیل کرتے ہیں اور جب تک وہ ہندوستانی عوام سے معافی نہیں مانگتے، احتجاج جاری رہے گا‘‘۔
بھٹو نے یہ تبصرے اقوام متحدہ کی سلامتی کونسل کے اجلاس میں دہشت گردی کی حمایت پر ہندوستان کے وزیر خارجہ ایس جے شنکر کے پاکستان پر شدید حملے کے بعد کئے۔