نہیں صاحب ہم جس تحریر کی بات کرنے جا رہے ہیں‘ وہ ہماری نہیں ہے… ہم آج خود کچھ لکھنے والے نہیں ہیں … ہم آج اپنی کوئی بات بھی کرنے والے نہیں ہیں… بلکہ کسی اور کی بات کریںگے ۔ پاکستان کے ایک سینئرصحافی اور تجزیہ کار‘سلیم صافی کے ایک کالم کی بات۔صافی اپنے ایک حالیہ کالم میں لکھتے ہیں کہ بلا شبہ اگر کسی ملک نے گزشتہ ۷۰ برسوں میں پاکستان کی سب سے زیادہ مدد کی ہے تو… تو وہ امریکہ ہے ۔اس ضمن میں صافی لکھتے ہیں’’ جبکہ یہ بھی حقیقت ہے کہ پورے پاکستان میں سب سے زیادہ نفرت امریکہ سے کی جاتی ہے اور جماعت اسلامی ہو یا بھٹو یا عمران خان وہ جب پاکستانی قوم کی ہمدردی حاصل کرنا چاہتے تو امریکی سازش کا نعرہ بلند کرتے ہیں‘‘۔ صافی کے مطابق ’’ چین نے ماضی میں پاکستان کے ساتھ جو بھلائی کی ہے وہ امریکہ کے مقابلے میں آٹے میں نمک کے برابر بھی نہیں لیکن پاکستان میں چین کے مخلص دوست ہونے پر اجماع ہے‘‘۔صافی یہ سوال کرتے ہیں شاید خود سے اور پاکستانیوں سے بھی آخر پاکستانی امریکہ سے اتنی نفرت کیوں کرتے ہیں؟تو … تو پھر خود ہی اس کا جواب ان الفاظ میں دیتے ہیں’’امریکہ کے بڑے بڑے عالی دماغ اور تھنک ٹینکس اس قضیے پر ہمہ وقت غور کے بعدبھی یہ سمجھنے سے قاصر ہیں کہ پاکستان میں امریکہ سے نفرت کیوں ہے؟ حالانکہ سیدھا سادا جواب یہ ہے کہ امریکی یہ سب کچھ کرتے رہے لیکن اس کے ساتھ ساتھ مداخلت کرکے اور ڈکٹیشن دے کرپاکستانیوں کی عزت نفس کو بھی مجروح کرتے رہے۔‘‘یقینا ہمیں اس سب سے کچھ لینا دینا نہیں ہے‘ امریکہ پاکستان کی مدد کرے یا پاکستانی… ایک عام پاکستانی امریکہ سے نفرت کرے ‘ ہمیں اس سے کچھ لینا دینا نہیں ہے… لیکن… لیکن صافی کی تحریر میں اس گتھی کا بھی جواب پوشیدہ ہے‘پنہاں ہے کہ افغانی پاکستان سے اتنی نفرت کیوں کرتے ہیں… حالانکہ پاکستان نے افغانیوں کی بہت مدد کی ‘ لاکھوں کی تعداد میں افغان رفیوجی اب کئی دہائیوں سے پاکستان میں موجود ہیں… افغانستان کی صورتحال کی وجہ سے بھی پاکستان میں امن نہیں… لیکن … لیکن پھر بھی ایک عام افغانی پاکستان سے اتنی ہی یا پھر اس سے زیادہ نفرت کیوں کرتا ہے جتنی نفرت ایک پاکستانی ‘ امریکہ سے کرتا ہے… تو… تو صافی کی تحریر سے ہی ہم اس کا جواب اخذ کر سکتے ہیں اور… اور سو فیصد کر سکتے ہیں ۔ جس طرح امریکہ پاکستان کے معاملات میں مداخلت کرتا ہے… بالکل اسی طرح پاکستان افغانستان میں مداخلت کرکے اور ڈکٹیشن دے کر افغانیوں کی عزت نفس کو بھی مجروح کرتا رہا ہے اور… اور آج بھی کررہا ہے ۔ہے نا؟
ایک تحریرمیں پنہاں جواب
