سابق وزیر اعظم کے قاتلوں کو رہا کرنے کا فیصلہ غلط:کانگریس

نئی دہلی//
کانگریس نے کہا ہے کہ سابق وزیر اعظم کا قتل ایک قومی مسئلہ ہے اور اس کا تعلق ملک کی خودمختاری، سالمیت، وجود اور اتحاد سے ہے ‘ اس لیے قصورواروں کو رہا کرنے کا فیصلہ غلط ہے ۔
کانگریس کے ترجمان ابھیشیک منو سنگھوی نے جمعہ کو یہاں پارٹی ہیڈکوارٹر میں ایک پریس کانفرنس میں کہا کہ سپریم کورٹ نے اس معاملے میں اسے دیئے گئے خصوصی آئینی اختیارات کا استعمال کیا ہے ۔ان کاکہنا تھا’’ عام حالات میں عدالت یہ فیصلہ نہیں دے سکتی تھی۔ اس کا مطلب ہے کہ فیصلے میں حقائق کو نظر انداز کیا گیا ہے اس لیے وہ اس فیصلے پر تنقید کرتے ہیں‘‘۔
سنگھوی نے کہا کہ سابق وزیر اعظم پر حملہ ہندوستان کی خودمختاری، اتحاد اور وجود پر حملہ ہے اور عدلیہ ان لوگوں کو فائدہ نہیں دے سکتی جنہوں نے سوچے سمجھے اور منصوبہ بندی کے ساتھ سابق وزیر اعظم کو قتل کیا ہے ۔
کانگریسی ترجمان نے کہا ’’سابق وزیر اعظم کا قتل ہندوستان کیلئے ایک دھچکا ہے اور ایسے مجرم کی رہائی کا حکم نہیں دیا جا سکتا تھا اس لئے عدالت نے آئین کے آرٹیکل۱۴۲میں دیے گئے اختیار کو استعمال کیا ہے ۔‘‘