محبوبہ اور عمر نے انتخابات سے قبل ہی ہار مان لی:ٹھاکر

سرینگر//
بھارتیہ جنتا پارٹی ( بی جے پی ) کے ترجمان الطاف ٹھاکر کاکہناہے کہ نیشنل کانفرنس کے عمر عبد اللہ اور پی ڈی پی کی صدر محبوبہ مفتی نے انتخابات سے قبل ہی ہار مان لی ہے‘اس لئے اب وہ مختلف بہانے تلاش کرکے آنے والے انتخابات میں حصہ نہ لینے کی باتیں کر رہے ہیں ۔
ٹھاکر جمعرات کے روز ترال کی دور افتادہ گوجر بستی کارمولہ میں ایک آؤٹ ریچ پروگرام کے دورے کے بعد میڈیا نمائندوں کے ساتھ بات کر رہے تھے ۔
بی جے پی ترجمان نے میڈیا نمائندوں کے ساتھ بات چیت کرتے ہوئے ایک سوال کے جواب میں کہا کہ نیشنل کانفرنس کے صدر عمر عبد اللہ کو یہ ڈر ہے کہ آنے والے انتخابات میں انہیں کوئی نشست نہیں ملی گی ‘‘۔
ٹھاکرنے کہاکہ دفعہ ۳۷۰ونٹی لیٹر پر تھی جس کو دفنایا گیا ہے اور اب ان کے پاس کچھ بچا نہیں ہے اس لئے اب وہ اس طرح کے بیان دے رہے ہیں ۔
بی جے پی ترجمان نے کہا’’پی ڈی پی کے پاس کچھ بچا ہی نہیں ہے۔ ان کے پاس ایک حق خان تھے وہ بھی ان کے ساتھ نہیں ہے‘‘۔
ٹھاکر نے کہا کہ عمر اور محبوبہ نے انتخابات سے پہلے ہی ہار مان لی ہے جبکہ انہیں معلوم ہے کہ ان کے کھوکھلے نعروں کے سوا ان کے پاس کچھ بچانہیںہے۔
بی جے پی ترجمان نے کہا کہ بھارتیہ جنتا پارٹی کی ہمیشہ یہ کوشش ہے کہ وہ پبلک آؤٹ ریچ پروگرام کے تحت سماجی کے کمزورطبقوں تک پہنچ کر انکے دُکھ درد کو سننے اور سمجھنے کی کوشش کرے ۔انہوں نے کہا کارمولہ میں انہوں گوجر طبقے کے لوگوں سے ملاقات کی ہے جہاں انہوں نے ان کے مسائل کو سنا اور ان کو حل کرنے کا یقین دلایا گیا ہے ۔