بھدرواہ//
جموں کشمیر کے ڈوڈہ ضلع کے شبنوٹ کرار کے مقام پر آج شام سڑک سے پھسل کر دریائے چناب میں گرنے سے چار افراد کی موت کا خدشہ ہے۔
ایس ڈی ایم ٹھاٹھری‘اطہر امین زرگر نے ایک مقامی خبر رساں ایجنسی کو بتایا کہ سفید رنگ کی کار جس میں چار لوگ سفر کر رہے تھے ڈوڈہ سے کشتواڑ کی طرف پریم نگر کے راستے جا رہی تھی۔
امین نے کہا’’کرارا میں پولیس ناکا پارٹی سے موصولہ اطلاعات کے مطابق، ڈرائیور نے کار پر کنٹرول کھو دیا جس کے بعد یہ بٹوٹ ، کشتواڑ قومی شاہراہ پر پھسل گئی اور شام ساڈھے سات بجے کے قریب دریائے چناب میں جا گری‘‘۔
اس دوران شمالی ضلع کپوارہ کے ہندوارہ علاقے میں منگل کی صبح ایک بس حادثے کا شکار ہوگئی جس کے نتیجے میں کم سے کم۲۸مسافر زخمی ہوگئے ۔
ذرائع نے بتایا کہ کپوارہ سے سرینگر آ رہی ایک گاڑی کے وتاین ہندوارہ علاقے کے نزدیک منگل کی صبح سڑک سے لڑھک گئی جس کے نتیجے میں اس میں سوار کم سے کم۲۸مسافر زخمی ہوگئے ۔
ذرائع نے کہا کہ زخمیوں کو علاج و معالجے کیلئے فوری طور پر ضلع ہسپتال ہندوارہ منتقل کیا گیا۔
ان کا کہنا تھا کہ زخمیوں میں سے ارشاد احمد ولد غلام قادر ساکن ترال اور مختی بیگم زوجہ غلام رسول میر ساکن ہندوارہ کو بون اینڈ جوائنٹ ہسپتال برزلہ ریفر کیا گیا جبکہ پروینہ بیگم اس کے چھوٹے بچے مسیب احمد اور ارشاد احمد بٹ ولد ولی محمد بٹ ساکن چوگل ہندوارہ کو شری مہاراجہ ہری سنگھ ہسپتال سری نگر ریفر کیا گیا۔
دریں اثنا پولیس نے اس ضمن میں ایک کیس درج کرکے تحقیقات شروع کی ہیں۔