راجوری میں دو الگ سڑک حادثات میں۵ہلاک‘۲۲ زخمی

جموں//
جموں وکشمیر کے ضلع راجوری میں جمعرات کے روز دو الگ الگ حادثات میں۵مسافر ہلاک جبکہ ۲۲دیگر زخمی ہوئے ہیں۔
سرکاری ذرائع نے بتایا کہ سرنکوٹ پونچھ سے جموں جا رہی ایک گاڑی چر کوٹ منجکوٹ علاقے کے نزدیک سڑک سے لڑھک ایک گہری کھائی میں جا گری۔
ذرائع نے کہا کہ حادثہ پیش آتے ہی پولیس، فوج اور مقامی لوگوں نے بڑے پیمانے پر بچاؤ آپریشن شروع کردیا۔
مقامی لوگوں کا کہنا ہے کہ حادثے کے نتیجے میں پانچ افراد کی بر سر موقع ہی موت واقع ہوگئی تاہم تحصیلدار منجاکوٹ جاوید چودھری نے بتایا کہ اس حادثے میں چار افراد کی موت واقع ہوئی ہے جبکہ زخمیوں کا ہسپتال میں علاج ومعالجہ چل رہا ہے ۔
قبل ازیں کوٹرانکہ سے راجوری جا رہی ایک گاڑی جمعرات کی صبح مندر گالا کے نزدیک سڑک سے لڑھک گئی جس کے نتیجے میں اس میں سوار سات افراد زخمی ہوگئے ۔انہوں نے کہا کہ زخمیوں میں دو کمسن بچے اور چار خواتین شامل ہیں۔
ان کا کہنا تھا کہ زخمیوں کو علاج و معالجے کے لئے فوری طور نزدیکی ہسپتال پہنچایا گیا جہاں ان میں سے چار کو جی ایم سی ایسو سیٹیڈ ہسپتال راجوری ریفر کیا گیا۔
زخمیوں کی شناخت بشارت احمد، اس کی اہلیہ گڈی بیگم، ان کی بیٹی مہرین کوثر، سیدہ تبسم،دلشاد احمد، گلناز اختر اور سلیمان رشید شامل ہیں۔
دریں اثنا پولیس نے اس ضمن میں ایک کیس درج کرکے قانونی کارروائیاں شروع کی ہیں۔
قابل ذکر ہے کہ پونچھ کے ضلع ساوجیاں علاقے میں بدھ کی صبح ایک دلدوز سڑک حادثے میں۱۱؍افراد از جان جبکہ۲۷دیگر زخمی ہوگئے ۔