ٹی۔ٹوئنٹی ورلڈ کپ کے لیے پاکستانی ٹیم کا اعلان، شان مسعود کو جگہ ملی

لاہور// پاکستان نے آسٹریلیا میں ہونے والے آئی سی سی ٹی۔20 ورلڈ کپ ٹورنامنٹ کے لیے اپنی ٹیم کا اعلان کر دیا ہے۔ گھٹنے کی انجری سے صحت یاب ہونے والے فخر زمان کی جگہ بائیں ہاتھ کے بلے باز شان مسعود کو اسکواڈ میں شامل کیا گیا ہے جبکہ زمان بطور ریزرو کھلاڑی دستیاب ہوں گے۔
چیف سلیکٹر محمد وسیم نے جمعرات کو پریس کانفرنس میں اسکواڈ کا اعلان کیا۔ اسٹار فاسٹ باؤلر شاہین شاہ آفریدی کو گھٹنے کی انجری سے صحت یاب ہونے کے بعد 15 رکنی ٹیم میں جگہ مل گئی ہے۔ آفریدی ایشیا کپ میں نہیں کھیل پائے۔ توقع ہے کہ وہ اگلے ماہ کے شروع میں مکمل طور پر فٹ ہو جائیں گے۔ پٹھوں کی تکلیف سے صحت یاب ہونے والے فاسٹ بولر محمد وسیم نے بھی ٹیم میں واپسی کی ہے، حالانکہ ایشیا کپ میں دستیاب حسن علی اور شاہنواز دہانی کو ورلڈ کپ اسکواڈ میں جگہ نہیں ملی ہے۔
بین الاقوامی سطح پر پہلی بار ٹی ٹوئنٹی فارمیٹ میں ڈیبیو کرنے والے بائیں ہاتھ کے بلے باز نے پی ایس ایل 2022 میں ملتان سلطان کی جانب سے کھیلتے ہوئے 12 اننگز میں 138.15 کے اسٹرائیک ریٹ سے 478 رنز بنا کر سلیکٹرز کی توجہ مبذول کروائی تھی۔ حالیہ قومی ٹی ٹوئنٹی میچ میں مسعود نے آٹھ اننگز میں 129.93 کے اسٹرائیک ریٹ سے 204 رنز بنائے تھے۔ یہاں یہ دلچسپ بات ہے کہ یہ رنز مڈل آرڈر میں بیٹنگ کرتے ہوئے ان کے بلے سے نکلے، جو موجودہ پاکستان ٹیم کی کمزور کڑی ہے۔
آسٹریلیا میں ہونے والے ورلڈ کپ سے قبل پاکستانی ٹیم 20 ستمبر سے انگلینڈ کے ساتھ ان کی ہی سرزمین پر سات ٹی ٹوئنٹی میچوں کی سیریز کھیلے گی جس کے بعد ٹیم 7 اکتوبر سے نیوزی لینڈ میں ہونے والے ٹرائنگولر ٹی ٹوئنٹی ٹورنامنٹ میں شرکت کرے گی۔ بنگلہ دیش کے علاوہ نیوزی لینڈ تیسری ٹیم ہوگی۔ 2009 کے ورلڈ کپ کی فاتح پاکستان کو آئندہ ورلڈ کپ کے لیے گروپ بی میں رکھا گیا ہے جہاں اس کا مقابلہ 24 اکتوبر کو روایتی حریف ہندوستان سے ہوگا۔
پاکستان کا ٹی ٹوئنٹی ورلڈ کپ اسکواڈ درج ذیل ہے: بابر اعظم (کپتان)، شاداب خان (نائب کپتان)، آصف علی، حیدر علی، حارث رؤف، افتخار احمد، خوشدل شاہ، محمد حسنین، محمد نواز، محمد رضوان، محمد وسیم ، نسیم شاہ، شاہین آفریدی، شان مسعود، عثمان قادر۔ریزرو: فخر زمان، محمد حارث اور شاہنواز دہانی