ہندوستانی کھلاڑیوں نے ٹی۔20 رینکنگ میں بڑی چھلانگ لگائی

دوبئی//ہندوستانی مرد کرکٹ ٹیم کے نوجوان بلے باز شریاس ایر اور رشبھ پنت نے آئی سی سی ٹی۔20 رینکنگ میں زبردست چھلانگ لگائی ہے، جب کہ سوریہ کمار یادو نے دوسرا مقام برقرار رکھا ہے۔
بدھ کو آئی سی سی کی جانب سے جاری کردہ تازہ ترین درجہ بندی کے مطابق ایر ویسٹ انڈیز کے خلاف ٹی ٹوئنٹی سیریز کے پانچویں اور آخری میچ میں نصف سنچری کی بدولت چھ درجہ ترقی کرکے 19 ویں نمبر پر آگئے ہیں۔
دوسری جانب سیریز کے چوتھے میچ میں 44 رنز بنانے کے بعد پنت سات مقام کے اضافے کے ساتھ 59ویں نمبر کے ٹی ٹوئنٹی بلے باز بن گئے ہیں۔ سری کمار یادو سیریز میں ہندوستان کی جانب سے 135 رنز کے ساتھ سب سے زیادہ رنز بنانے والے کھلاڑی رہے۔ تاہم پانچویں میچ میں آؤٹ ہونے کی وجہ سے وہ ٹی ٹوئنٹی رینکنگ میں بابر کو پیچھے نہیں چھوڑ سکے اور دوسری پوزیشن پر برقرار رہے۔
ونڈیز کے خلاف ٹی ٹوئنٹی سیریز میں بھی کئی باؤلرز نے عمدہ کارکردگی کا مظاہرہ کرتے ہوئے اپنی رینکنگ بہتر کی۔
ہندوستان کی جانب سے نوجوان اسپنر روی بشنوئی نے سب سے زیادہ وکٹیں حاصل کیں۔ 21 سالہ بشنوئی نے سیریز میں آٹھ وکٹیں حاصل کیں جس کی وجہ سے وہ 50 درجے کی چھلانگ لگا کر نمبر 44 بولر بن گئے۔ اس کے علاوہ اویش خان (59)، اکسر پٹیل (60) اور کلدیپ یادو (89) نے بھی اپنی رینکنگ میں بہتری لائی ہے، جب کہ تجربہ کار بولر بھونیشور کمار پوری سیریز میں صرف تین وکٹیں لینے کے بعد ایک مقام نیچے نویں نمبر پر آگئے ہیں۔