سرینگر؍۱۲نومبر
کشمیر کے متعدد بالائی علاقوں میں تازہ برف باری جبکہ میدانی علاقوں میں بارشوں کے نتیجے میں دن کے درجہ حرارت میں کئی ڈگری کی کمی واقع ہوئی ہے۔
حکام نے جمعرات کو بتایا کہ مغربی ہواؤں کے زیر اثر کشمیر کے بالائی علاقوں بشمول سیاحتی مقامات گلمرگ اور سونہ مرگ میں رات کے دوران تازہ برف باری ہوئی۔
انہوں نے بتایا کہ گریز اور کپواڑہ کے بالائی علاقوں کے علاوہ زوجیلا پاس اور جنوبی کشمیر کے ضلع شوپیاں میں واقع مغل روڈ پر بھی برف باری ریکارڈ کی گئی۔
حکام کے مطابق سرینگر،لیہہ قومی شاہراہ کو ملانے والے زوجیلا پاس پر برف جمع ہونے کے باعث شاہراہ پر ٹریفک کی نقل و حرکت معطل کر دی گئی ہے۔
ادھر وادی کے میدانی علاقوں بشمول گرمائی دارالحکومت سری نگر میں بارشوں کا سلسلہ جاری رہا۔ بارشوں کے نتیجے میں دن کے درجہ حرارت میں کئی ڈگری کی کمی درج کی گئی۔
حکام نے بتایا کہ شمالی کشمیر میں اوڑی،بارہمولہ قومی شاہراہ پر راجن وانی کے مقام پر بارشوں کے باعث مٹی کے تودے گر آئے، جس کے نتیجے میں ٹریفک کی نقل و حرکت متاثر ہوئی۔
لینڈ سلائیڈنگ کے باعث سڑک پر ملبہ اور بڑے پتھر جمع ہو گئے، جس سے گاڑیوں کی آمدورفت مکمل طور پر رک گئی اور کئی مسافر راستے میں پھنس گئے۔
حکام کے مطابق سڑک سے ملبہ ہٹانے اور ٹریفک بحال کرنے کے لیے کارروائیاں شروع کر دی گئی ہیں۔
محکمہ موسمیات نے پیش گوئی کی ہے کہ جمعہ کی دوپہر تک بیشتر مقامات پر میدانی علاقوں میں ہلکی سے درمیانی بارش اور بالائی علاقوں میں برف باری کا امکان ہے، جبکہ بعض مقامات پر درمیانی سے شدید بارش یا برف باری ہو سکتی ہے۔
محکمے کے مطابق۱۴؍اور۱۵ نومبر کو بھی چند مقامات پر مختصر وقت کے لیے ہلکی بارش یا برف باری کا امکان ہے، جبکہ۱۶ سے۲۰ نومبر تک موسم عمومی طور پر خشک رہنے کی توقع ہے۔
ادھر جمعرات کو ہلکی برف باری اور موسم کی خراب صورتحال کے پیش نظر مغل روڈ کو عارضی طور پر بند کر دیا گیا۔
حکام نے بتایا کہ برف باری کے باعث سڑک پر پھسلن پیدا ہونے کے بعد مسافروں کی حفاظت کو یقینی بنانے کے لیے احتیاطی اقدام کے طور پر گاڑیوں کی آمدورفت معطل کر دی گئی ہے۔
محکمہ موسمیات نے پہلے ہی۱۲؍اور۱۳؍نومبر کو بالائی علاقوں میں برف باری جبکہ میدانی علاقوں میں درمیانی درجے کی بارش کی پیش گوئی کی تھی۔
حکام نے کہا کہ موسم میں بہتری آنے اور متعلقہ محکموں سے کلیئرنس ملنے کے بعد مغل روڈ کو دوبارہ ٹریفک کے لیے کھول دیا جائے گا۔مسافروں کو ہدایت دی گئی ہے کہ اگلے احکامات تک اس سڑک پر سفر کرنے سے گریز کریں اور تازہ ترین صورتحال جاننے کے لیے ٹریفک کنٹرول روم سے رابطہ کریں۔
۔۔۔۔۔(ایجنسیاں )
