جنوبی کوریا سے 0-2 سے پیچھے ہونے کے بعد ہندوستان مشکل میں

سول، 18 ستمبر (یو این آئی) سول میں جمعہ کے روز ڈیوڈ کپ 2026 کوالیفائر کے دوسرے دور کے مقابلے میں جنوبی کوریا کے خلاف ہندوستان کا پہلا دن 2-0 سے پیچھے رہنے کے ساتھ ختم ہوا، جہاں دکشنیشور سریش اور سمیت ناگل دونوں ہی اپنے اپنے سنگلز میچ ہار گئے۔
انڈین ٹینس ٹیم اس وقت پیچھے ہو گئی جب دنیا کے 367 ویں نمبر کے کھلاڑی دکشنیشور سریش، 157 ویں رینکنگ والے کوون سون-وو سے دو گھنٹے پانچ منٹ میں 3-6، 6-3، 6-4 سے ہار گئے۔ اس کے بعد، ہندوستان کے ٹاپ رینک والے سنگلز ٹینس کھلاڑی سومیت ناگل (دنیا کے 247 ویں نمبر کے کھلاڑی) دوسرے سنگلز مقابلے میں سابق آسٹریلین اوپن سیمی فائنلسٹ چنگ ہیون سے 2-6، 6-4، 7-5 سے ہار گئے۔
سریش نے دوسرے گیم میں کوون سون-وو کی سروس توڑی اور 3-0 کی برتری حاصل کر لی۔ اس کے بعد ہندوستانی کھلاڑی نے اپنی سروس برقرار رکھتے ہوئے پہلا سیٹ جیت لیا۔ دوسرا سیٹ سروس کے حساب سے چل رہا تھا، لیکن چھٹے گیم میں کوون سون-وو نے سریش کی سروس توڑ کر 4-2 کی برتری حاصل کر لی۔ اس کے بعد جنوبی کوریائی کھلاڑی نے سیٹ جیت لیا اور میچ کو فیصلہ کن سیٹ (ڈیسائیڈر) تک پہنچا دیا۔ فیصلہ کن سیٹ میں بھی اسکور 2-2 کی برابری پر تھا، لیکن پانچویں گیم میں کوون سون-وو نے اہم بریک حاصل کیا اور پہلا مقابلہ (ربڑ) اپنے نام کر لیا۔
اس کے بعد، ہندوستان کے ٹاپ رینک والے سنگلز ٹینس کھلاڑی سومیت ناگل (دنیا کے 247 ویں نمبر کے کھلاڑی) دوسرے سنگلز مقابلے میں سابق آسٹریلین اوپن سیمی فائنلسٹ چنگ ہیون سے 2-6، 6-4، 7-5 سے ہار گئے۔ سومیت ناگل نے شاندار شروعات کی اور 4-0 کی برتری حاصل کرنے کے بعد پہلا سیٹ جیت لیا۔ دوسرا سیٹ 4-4 کی برابری پر چل رہا تھا، لیکن نویں گیم میں چنگ ہیون نے ناگل کی سروس توڑی اور اپنی سروس برقرار رکھتے ہوئے میچ کو فیصلہ کن سیٹ تک پہنچا دیا۔ چنگ ہیون نے آخری سیٹ میں 4-1 کی برتری حاصل کر لی تھی، لیکن ناگل نے واپسی کرتے ہوئے اسکور 4-4 سے برابر کیا اور 5-5 کے اسکور پر مقابلے میں بنے رہے۔ جنوبی کوریائی کھلاڑی نے اپنی سروس بچا کر 6-5 کی برتری حاصل کی اور پھر 12 ویں گیم میں ناگل کی سروس توڑ کر شاندار واپسی کی۔
2-0 سے پیچھے چل رہی بھارتی ٹیم کو ڈیوڈ کپ 2026 کے ‘فائنل 8’ میں جگہ بنانے کے لیے دوسرے اور آخری دن کے تینوں میچ جیتنے ہوں گے۔ ہفتے کے روز ہونے والے ابتدائی ڈبلز میچ میں دنیا کے 49 ویں نمبر کے کھلاڑی این سری رام بالاجی اور 88 ویں رینکنگ والے نکی کلیانڈا پوناچا کا مقابلہ نام جی-سنگ اور پارک ہوئی-سنگ سے ہوگا۔
اگر بھارت ڈبلز میچ جیت جاتا ہے، تو ناگل کا سامنا پہلے ریورس سنگلز میچ میں کوون سون-وو سے ہوگا؛ اس کے بعد، ضرورت پڑنے پر پانچویں میچ میں سریش کا مقابلہ چنگ ہیون سے ہوگا۔
اس مقابلے کی فاتح ٹیم نومبر میں اٹلی کے بولوگنا میں ہونے والے ڈیوڈ کپ ‘فائنل 8’ میں پہنچے گی، جبکہ ہارنے والی ٹیم 2027 ڈیوڈ کپ کوالیفائرز کے پہلے دور میں کھیلے گی۔
ہندوستان تین بار (1966، 1974 اور 1987 میں) ڈیوڈ کپ میں نائب فاتح (رنر اپ) رہا ہے، لیکن موجودہ فارمیٹ کے تحت ابھی تک ‘فائنل 8’ میں نہیں پہنچ سکا ہے۔