جے شنکر بھوٹان کے دورے پر پارو پہنچ گئے، شاہی ملاقات متوقع

سلی گڑی، 17 ستمبر (یو این آئی) وزیر خارجہ ڈاکٹر ایس جے شنکر اور بھوٹان کے وزیر خارجہ و خارجہ تجارت ڈی این دھونگ ییل جمعرات کو جاری اعلیٰ سطحی دوطرفہ روابط کے سلسلے میں بھوٹان کے شہر پارو پہنچ گئے دورے کے دوران ڈاکٹر جے شنکر کی بھوٹان کے بادشاہ سے شاہی ملاقات اور وزیر اعظم سے ملاقات متوقع ہے ڈاکٹر جے شنکر اور لیونپو ڈی این دھونگ ییل نے بدھ کو 3 بڑے دوطرفہ بنیادی ڈھانچے کے منصوبوں کی مشترکہ طور پر افتتاحی تقریبات میں شرکت کی، جو ہندوستان اور بھوٹان کے درمیان طویل عرصے سے جاری ترقیاتی شراکت داری کی عکاسی کرتے ہیں۔
تھمپو میں بہندوستانی سفارتخانے کے مطابق دونوں وزرا نے گاسا میں 500 کلوواٹ کے لُنانا پن بجلی منصوبے کا سنگِ بنیاد رکھنے، مونگار میں 65 بستروں پر مشتمل گیالٹسون جیٹسن پیما مدر اینڈ چائلڈ ہسپتال کا افتتاح کرنے اور سامدرپ جونگکھار میں 80 میٹر طویل جگن ناتھن پل کا افتتاح کرنے کی تقریبات میں مشترکہ طور پر شرکت کی۔
لُنانا پن بجلی منصوبے کا مقصد بھوٹان کی ان باقی آبادیوں کو بجلی فراہم کرنا ہے جہاں اب تک بجلی نہیں پہنچی۔ ہندوستانی سفارتخانے نے اس منصوبے کو دونوں ممالک کے درمیان طویل عرصے سے جاری توانائی تعاون میں ایک اور اہم سنگِ میل قرار دیا۔ یہ تعاون 1967 میں تھمپو میں بھوٹان کے پہلے پن بجلی گھر، جنگشینا، سے شروع ہوا تھا۔
مونگار میں گیالٹسون جیٹسن پیما مدر اینڈ چائلڈ ہسپتال جدید سہولیات سے آراستہ 65 بستروں کا خصوصی طبی مرکز ہے، جس کا مقصد مشرقی بھوٹان میں معیاری اور خصوصی زچگی و بچوں کی صحت کی خدمات تک رسائی کو بہتر بنانا ہے۔
بھوٹان-ہندوستان دوستی کے فریم ورک کے تحت پروجیکٹ دانتک کے ذریعے تعمیر کیا گیا جگن ناتھن پل مشرقی بھوٹان میں تراشی گانگ اور سامدرپ جونگکھار کے درمیان رابطے کو بہتر بنانے میں معاون ثابت ہوگا۔
تینوں منصوبے توانائی، صحت اور ٹرانسپورٹ کے بنیادی ڈھانچے کے شعبوں سے متعلق ہیں اور بھارت و بھوٹان کے درمیان ترقیاتی شراکت داری کے وسیع دائرہ کار کی عکاسی کرتے ہیں۔
ڈاکٹر جے شنکر کا دورہ دونوں ممالک کے درمیان باقاعدہ اعلیٰ سطحی تبادلوں کا حصہ ہے، جس کا مقصد بھارت اور بھوٹان کے درمیان دیرینہ دوستی اور تعاون کے تعلقات کو مزید مضبوط بنانا ہے۔