ایشین گیمز کے تمغہ جیتنے والے باکسرز کو لاس اینجلس اولمپکس کے لیے براہ راست کوالیفائی کرنے کا موقع

نئی دہلی، 16 ستمبر (یواین آئی) ایشین گیمز میں تمغہ جیتنے والے باکسرز کو 2028 کے لاس اینجلس اولمپکس کے لیے کوالیفائی کرنے کا براہ راست موقع ملے گا۔ انہیں قازقستان میں ہونے والی 2027 ورلڈ باکسنگ چیمپئن شپ میں براہ راست داخلہ دیا جائے گا، جو اولمپکس کے لیے پہلا کوالیفائنگ ایونٹ ہوگا۔
باکسنگ فیڈریشن آف انڈیا (بی ایف آئی) نے لاس اینجلس اولمپکس کے لیے زیادہ سے زیادہ ہندوستانی باکسرز کو کوالیفائی کرانے کے مقصد سے تفصیلی سلیکشن پالیسی جاری کی ہے۔ اس میں ’ورلڈ باکسنگ‘ کے تیار کردہ اور بین الاقوامی اولمپک کمیٹی (آئی او سی) سے منظور شدہ کوالیفکیشن نظام کی بنیاد پر چار مرحلوں پر مشتمل طریقہ کار طے کیا گیا ہے۔ 2027 ورلڈ باکسنگ چیمپئن شپ کے بعد چین میں ایشیائی کوالیفائر اور 2028 میں اٹلی اور ہنگری میں دو عالمی کوالیفائنگ ٹورنامنٹ ہوں گے۔
بی ایف آئی کے سرکلر کے مطابق 2026 ایشین گیمز کے تمغہ جیتنے والے باکسرز کو متعلقہ ویٹ کیٹیگری میں مرکزی امیدوار کے طور پر منتخب کیا جائے گا، جبکہ 10ویں ایلیٹ نیشنل چیمپئن شپ کے طلائی تمغہ جیتنے والے کو ریزرو امیدوار رکھا جائے گا۔ جن ویٹ کیٹیگریز میں ہندوستان نے ایشین گیمز میں کوئی تمغہ نہیں جیتا اور جو کیٹیگریز ایشین گیمز میں شامل نہیں تھیں، ان میں 10ویں ایلیٹ نیشنل چیمپئن شپ کے طلائی تمغہ جیتنے والے کو مرکزی امیدوار منتخب کیا جائے گا۔
جو باکسر ورلڈ چیمپئن شپ میں کوٹا باؤٹ راؤنڈ تک پہنچیں گے لیکن کوٹا حاصل نہیں کرپائیں گے، انہیں ایشیائی کوالیفائر میں براہ راست داخلہ ملے گا۔ باقی مقامات نیشنل کوچنگ کیمپ میں شامل ایلیٹ باکسرز کے درمیان رینکنگ سلیکشن ٹرائلز کے ذریعے پُر کیے جائیں گے۔ 2028 کے دونوں عالمی کوالیفائنگ ٹورنامنٹس کے لیے بھی اسی طریقہ کار پر عمل کیا جائے گا۔
بی ایف آئی کے صدر اجے سنگھ نے کہا کہ یہ پالیسی باکسرز کو لاس اینجلس اولمپکس تک پہنچنے کے لیے واضح اور منظم راستہ فراہم کرنے کے مقصد سے تیار کی گئی ہے۔ نیشنل کوچنگ کیمپ میں 10ویں ایلیٹ نیشنل چیمپئن شپ کے تمغہ جیتنے والے، ایشین گیمز کے تمغہ جیتنے والے اور بی ایف آئی سلیکشن کمیٹی کے ضوابط کے تحت منتخب وائلڈ کارڈ باکسر شامل ہوں گے۔ غیر اولمپک ویٹ کیٹیگریز میں 10ویں ایلیٹ نیشنل چیمپئن شپ کے طلائی تمغہ جیتنے والے 2027 ورلڈ چیمپئن شپ کے لیے مرکزی امیدوار اور چاندی کے تمغہ جیتنے والے ریزرو امیدوار ہوں گے۔