مرکزی وزیر مملکت رکشا کھڈسے نے میزورم میں کھیلوں کے نظام کا جائزہ لیا

آئیزول، 15 ستمبر (یو این آئی) کھیل کی مرکزی وزیر مملکت رکشا کھڈسے نے آئیزول کے دورے کے دوران میزورم میں کھیلوں کے نظام کا جائزہ لیا۔ دورے کا مقصد کھیلوں کے بنیادی ڈھانچے کو مضبوط کرنا، کھلاڑیوں کو سہولیات فراہم کرنا اور شمال مشرقی خطے کے کھیلوں کے ٹیلنٹ کے لیے بہتر مواقع پیدا کرنا تھا۔
محترمہ کھڈسے نے میزورم حکومت کے وزیر مملکت برائے کھیل و نوجوان خدمات پُو لالننگلووا ہمار سے ملاقات کی اور ریاست میں کھیلوں کے نظام کو مزید مضبوط بنانے کے اقدامات پر تبادلۂ خیال کیا۔ بات چیت میں مرکز و ریاست کے درمیان تال میل، کھیلوں کے بنیادی ڈھانچے کی ترقی، ٹیلنٹ کو نکھارنے اور نوجوان کھلاڑیوں کے لیے مواقع بڑھانے پر توجہ دی گئی۔
انہوں نے آئیزول میں اسپورٹس اتھارٹی آف انڈیا (سائی) مرکز کا دورہ بھی کیا، جہاں بنیادی سہولیات کا جائزہ لینے کے ساتھ کھلاڑیوں، کوچز اور معاون عملے سے بات چیت کی۔ انہوں نے کھلاڑیوں کی تربیت، مقابلوں کے تجربات اور ان کے مستقبل کے عزائم کے بارے میں معلومات حاصل کیں اور اچھی کوچنگ، اسپورٹس سائنس، بحالی، غذائیت اور قومی و بین الاقوامی سطح پر مقابلوں کے مواقع کی اہمیت پر زور دیا۔
محترمہ کھڈسے نے کہا کہ میزورم نے خاص طور پر فٹ بال اور ہاکی میں کھیلوں کی زبردست صلاحیت کا مظاہرہ کیا ہے۔ انہوں نے کہا کہ ’کھیلو انڈیا‘ سمیت سرکاری اقدامات اور سائی کی ادارہ جاتی معاونت نوجوان کھلاڑیوں کو زمینی سطح سے مسابقتی کھیلوں تک پہنچنے کے لیے بہتر راستہ فراہم کر رہی ہے۔ آئیزول کے سائی ٹریننگ سینٹر میں مصنوعی ہاکی ٹرف اور روشنی کی سہولت فراہم کرنے کا ’کھیلو انڈیا‘ منصوبہ بھی ریاست میں ہاکی کے بنیادی ڈھانچے کو بہتر بنانے کی سمت اہم قدم ہے۔
انہوں نے میزورم کی لالریمسیامی ہمارزوتے کی مثال دیتے ہوئے کہا کہ وہ ریاست کی پہلی خاتون اولمپین اور ایشیائی کھیلوں کی تمغہ جیتنے والی کھلاڑی ہیں۔ انہوں نے قومی سطح پر پہنچنے سے قبل تھینزول میں سائی اکیڈمی میں تربیت حاصل کی تھی اور انہیں ارجن ایوارڈ 2025 کے لیے بھی منتخب کیا گیا ہے۔ رکشا کھڈسے نے کہا کہ حکومت کا مقصد ایسا مکمل کھیلوں کا نظام تیار کرنا ہے، جس میں بنیادی سہولیات کے ساتھ معیاری کوچنگ، اسپورٹس سائنس، بحالی، غذائیت اور باقاعدہ مقابلوں کے مواقع دستیاب ہوں۔
انہوں نے کہا کہ شمال مشرقی خطہ اپنی مضبوط کھیل ثقافت اور بھرپور صلاحیت کے باعث ہندوستان کے کھیلوں کے سفر میں اہم کردار ادا کرتا ہے۔ کھلاڑیوں کے قریب سہولیات مضبوط کرنے، نوجوان ٹیلنٹ کے مواقع بڑھانے اور مرکز و ریاست کے مؤثر تال میل سے میزورم اور پورے شمال مشرق سے مزید کھلاڑیوں کو قومی و بین الاقوامی سطح تک پہنچنے میں مدد ملے گی۔