ٹیرو انڈیا نے ہندوستان میں موئے تھائی کا آغاز کیا

نئی دہلی، 14 ستمبر (یو این آئی) ٹیرو انڈیا نے ’موئے تھائی کی جذبے کو اجاگر کرنا‘ کی تھیم پر اپنی موئے تھائی پہل شروع کرکے ہندوستان کے تفریحی-کھیل کے نظام میں اپنی توسیع جاری رکھی۔ اس پروگرام میں ٹیرو انٹرٹینمنٹ، اسپورٹس اتھارٹی آف تھائی لینڈ، فائرٹیکس فائٹ کے رہنما شامل ہوئے، تاکہ ملک میں موئے تھائی کو ایک کھیل کے طور پر فروغ دینے کے ٹیرو کے وژن کو سب کے سامنے لایا جا سکے۔
پروگرام کی خاص توجہ اسپورٹس اتھارٹی آف تھائی لینڈ کے گورنر ڈاکٹر گونگساک یودمنی کے ویڈیو پیغام پر رہی، جس میں موئے تھائی کے ذریعے دونوں ممالک کو ایک ساتھ لانے کے رائل تھائی حکومت کے وژن کو پیش کیا گیا۔
ڈاکٹر یودمنی نے زور دیا کہ رائل تھائی حکومت موئے تھائی کو ایک اہم قومی ’سافٹ پاور‘ اثاثہ مانتی ہے- جو ایک ثقافتی مارشل آرٹ اور اقتصادی ترقی کا ذریعہ، دونوں ہے- اور اسپورٹس اتھارٹی آف تھائی لینڈ 3 ستونوں کے ذریعے ہندوستان میں اس پہل کی حمایت کرے گی:
· ہندوستانی کوچ اور کھلاڑیوں کو تسلیم شدہ نصاب اور تربیت دے کر معیاری موئے تھائی کو فروغ دینا؛
· دونوں ممالک کے درمیان تعلقات اور کھیلوں کی سیاحت کو فروغ دینا؛
· تصدیق شدہ سازوسامان، جم کی منظوری اور پروگراموں کے انعقاد کے ذریعے وسیع موئے تھائی نظام کی حمایت کرنا۔
انہوں نے کہا کہ "ہندوستان ایک بڑی آبادی اور نوجوانوں کی بڑی تعداد والا ایسا بازار ہے، جو جنگی کھیلوں اور فٹنس کے تئیں تیزی سے پرجوش ہو رہے ہیں۔” انہوں نے اس پہل کو عملی شکل دینے کے لیے ٹیرو انٹرٹینمنٹ، فائرٹیکس اور دونوں ممالک کے معاون اداروں کا شکریہ ادا کیا۔
ٹیرو انٹرٹینمنٹ کے منیجنگ ڈائریکٹر اور بانی برائن ایل مارکر نے کہا کہ "ٹیرو انٹرٹینمنٹ کی بنیاد 1990 میں رکھی گئی تھی اور تھائی لینڈ میں تقریباً 4 دہائیوں سے بڑے کھیلوں کے انعقاد کو فروغ دینے کی ہماری شاندار تاریخ رہی ہے۔ ٹیرو انڈیا کے ساتھ، اب ہمارا منصوبہ اس متحرک بازار میں بھی ایسا ہی کرنے کا ہے۔ نوجوانوں کی بڑی آبادی کے ساتھ، کھیلوں کے مقابلوں اور کھیلوں کے پروگراموں کی ترقی کے لیے ہندوستان کسی بھی دوسرے ملک کے مقابلے میں بہتر پوزیشن میں ہے۔