سرینگر/۷ستمبر
جموں و کشمیر کا پہلا بین الاقوامی فلم فیسٹیول (آئی ایف ایف جے کے) پیر کو سری نگر میں شروع ہوگیا، جہاں فنکاروں اور حکام نے اسے خطے کو بالی ووڈ اور عالمی فلمی صنعت سے دوبارہ جوڑنے کی جانب ایک اہم قدم قرار دیا۔
چار روزہ فلم فیسٹیول۷ سے۱۰ ستمبر تک جاری رہے گا اور اسے جموں و کشمیر حکومت اور محکمہ اطلاعات و تعلقات عامہ (ڈی آئی پی آر) کی حمایت حاصل ہے۔
جموں و کشمیر کے چیف سیکریٹری‘ اتل ڈلو نے کہا کہ فلم فیسٹیول کو زبردست پذیرائی ملی ہے اور۸۰ ممالک سے۱۱۰۰۱ سے زائد فلمیں نمائش کے لیے موصول ہوئیں۔
ڈلو نے کہا، ’’جیسا کہ آپ سب جانتے ہیں، جموں و کشمیر کا پہلا بین الاقوامی فلم فیسٹیول آج شروع ہورہا ہے۔ یہ ۷سے۱۰ ستمبر تک چار روزہ فیسٹیول ہوگا۔ جب ہم نے فلم فیسٹیول میں نمائش کے لیے فلموں کے اندراج کی دعوت دی تو ہمیں زبردست ردعمل ملا۔۸۰ ممالک سے۱۱۰۰سے زائد فلمیں موصول ہوئیں۔‘‘
انہوں نے کہا کہ محتاط جانچ پڑتال کے بعد۱۳۵ فلموں کو فیسٹیول کے دوران نمائش کے لیے منتخب کیا گیا ہے، جن میں۶۰سے زائد غیر ملکی فلمیں شامل ہیں۔
چیف سیکریٹری نے کہا، ’’دستیاب وقت کو مدنظر رکھتے ہوئے مکمل جانچ کے بعد۱۳۵ فلموں کو ان چار دنوں کے دوران نمائش کے لیے منتخب کیا گیا۔ ان میں۶۰ سے زائد غیر ملکی فلمیں شامل ہیں۔‘‘انہوںنے کہا کہ فیسٹیول کا مقصد جموں و کشمیر کو عالمی سینما کی دنیا سے دوبارہ جوڑنا اور فلم سازوں کو خطے میں آکر فلمیں بنانے کی دعوت دینا ہے۔
ڈلو نے کہا، ’’یہ فیسٹیول جموں و کشمیر کو عالمی سینما کی دنیا سے دوبارہ جوڑنے کا ایک موقع ہے۔ ہم بھارت اور بیرون ملک کی فلمی صنعت سے وابستہ افراد کو دعوت دیتے ہیں کہ وہ ہماری ثقافت، کھانوں اور ورثے کو دیکھیں اور جموں و کشمیر کو ایک بار پھر فلم سازی کے لیے ایک ممتاز مقام کے طور پر قائم کریں۔‘‘انہوں نے مزید کہا کہ فیسٹیول سینما کے مختلف شعبوں میں مقامی نوجوانوں کے لیے بھی مواقع پیدا کرے گا۔
چیف سیکریٹری نے کہا، ’’یہ ہمارے باصلاحیت اور پرعزم نوجوانوں کے لیے سینما کے مختلف شعبوں، بشمول فوٹوگرافی، ہدایت کاری، تکنیکی شعبوں، اداکاری، موسیقی اور گیت نگاری میں بے شمار مواقع فراہم کرے گا۔ یہ فلمی صنعت اور جموں و کشمیر دونوں کے لیے ایک ایسی صورت حال ہے جس میں سب کا فائدہ ہے۔ ہمارا مقصد سال بہ سال اس تعلق کو مزید مضبوط کرنا ہے۔‘‘
مقامی فنکار بندیا ٹکو نے اس اقدام کا خیرمقدم کرتے ہوئے اسے خطے کے فنکاروں کے لیے ایک اہم موقع قرار دیا۔انہوں نے کہا، ’’حکومت اور ڈی آئی پی آر کی کوششوں سے پہلی مرتبہ یہاں اس نوعیت کا پلیٹ فارم قائم کیا گیا ہے۔ میرا خیال ہے کہ ہم تمام فنکاروں کے لیے اس سے زیادہ خوشی کا لمحہ اور کوئی نہیں ہوسکتا۔‘‘انہوں نے فیسٹیول میں پیش کی جانے والی فلموں کے تنوع کو بھی اجاگر کیا۔
ٹکو نے کہا، ’’آج آپ ایک ہی جگہ علاقائی سینما اور کشمیری زبان کی فلموں کے ساتھ لبنانی زبان کی فلمیں بھی دیکھ سکتے ہیں۔ یہ صرف ایک اسکرین تک محدود نہیں ہے بلکہ۱۰ سے۱۵ اسکرینیں تیار کی گئی ہیں۔‘‘
انہوں نے مزید کہا، ’’ہم واقعی کشمیر میں عالمی سینما کے متحرک رنگوں کا مشاہدہ کررہے ہیں۔ اس سے بہتر اور کیا ہوسکتا ہے۔ میں اسے لازمی طور پر احیا کا نام نہیں دوں گی، لیکن کشمیر اور فلمی صنعت، بشمول عالمی سینما، کے درمیان ایک فاصلہ پیدا ہوگیا تھا۔ اب اس فاصلے کو ختم کیا جارہا ہے۔‘‘
مقامی اداکار اور فنکار شبیر احمد نے فیسٹیول کو کشمیر کے ساتھ بالی ووڈ کے دیرینہ تعلق کو بحال کرنے کی جانب ایک مثبت قدم قرار دیا۔انہوں نے کہا، ’’میرا تاثر یہ ہے کہ یہ ایک انتہائی مثبت اور قابل خیرمقدم قدم ہے۔ کئی دہائیوں سے بالی ووڈ کا کشمیر کے ساتھ گہرا تعلق رہا ہے اور یہ فیسٹیول اس تعلق کی بحالی ہے۔ یہ ایک کھلی دعوت ہے۔ آنے والے موسم خزاں میں یہ فلم سازوں کو دعوت دیتا ہے کہ وہ یہاں اپنی میوزک ویڈیوز اور فلموں کی شوٹنگ کریں اور کشمیر کے حقیقی حسن کو دنیا کے سامنے پیش کریں۔‘‘
احمد نے مقامی فنکاروں کی زیادہ سے زیادہ شمولیت کی ضرورت پر بھی زور دیا۔انہوں نے کہا، ’’یہ ہماری مقامی فلمی صنعت سے وابستہ افراد کے لیے بھی ایک بہترین موقع ہے۔ تاہم حکومت کے لیے ضروری ہے کہ وہ ایسی حکمت عملی وضع کرے جس سے مقامی فنکاروں کو محسوس ہو کہ یہ فیسٹیول واقعی ان کی اپنی برادری اور خطے کے لیے ہورہا ہے۔‘‘
کشمیر میں بالی ووڈ فلموں کی باقاعدہ شوٹنگ کے دور کو واپس لانے کے بارے میں پوچھے جانے پر شبیر احمد نے کہا، ’’یہ درست ہے اور یہی ایک اہم مقصد بھی ہے۔ اگر ہم خود کو ایک مہمان نواز میزبان کے طور پر پیش کریں گے تو مستقبل میں آنے والے فلم سازوں کو یہ پیغام ملے گا کہ کشمیر کے لوگ نہ صرف سینما کو پسند کرتے اور سمجھتے ہیں بلکہ اعلیٰ معیار کی فلمیں بنانے اور پیش کرنے کی صلاحیت بھی رکھتے ہیں۔‘‘
مقامی فنکاروں کی شمولیت کے سوال پر انہوں نے کہا، ’’یقینی طور پر وہ شامل ہوں گے۔ اگر بیرونِ کشمیر سے پروڈکشن ٹیمیں آتی ہیں تو بنیادی طور پر انہیں صرف اپنا اسکرپٹ لانا ہوگا، باقی تمام ضروری وسائل انہیں یہیں دستیاب ہوسکتے ہیں۔‘‘
بالی ووڈ کے سینئر اداکار اکبر خان نے بھی فلم فیسٹیولز کو ثقافتی پل بنانے کا ذریعہ قرار دیتے ہوئے جموں و کشمیر کو فلم سازی کے لیے ایک مثالی مقام قرار دیا۔انہوں نے کہا، ’’میں اس بات پر زور دینا چاہتا ہوں کہ فلم فیسٹیول ثقافتی تقریبات ہوتی ہیں جو مختلف ممالک کے درمیان پل قائم کرتی ہیں اور ثقافت، تاریخ اور تہذیب کے تبادلے کا موقع فراہم کرتی ہیں۔ میرے خیال میں ہمارے ملک میں فلم سازی کے لیے جموں و کشمیر سے زیادہ خوبصورت اور موزوں کوئی اور جگہ نہیں۔‘‘
کشمیر کے ساتھ بالی ووڈ کے ماضی کے تعلق کو یاد کرتے ہوئے اکبر خان نے کہا، ’’تقریباً۱۵ سے۲۰ سال پہلے آپ خطے کے ہر کونے میں بالی ووڈ کی پروڈکشن ٹیمیں دیکھ سکتے تھے۔ کئی برس تک کشمیر بالی ووڈ کے لیے ایک بہت بڑے اوپن ایئر اسٹوڈیو کی حیثیت رکھتا تھا۔‘‘انہوں نے خطے کی ثقافت اور عوام کے جذبات کے احترام اور تحفظ کی ضرورت پر بھی زور دیا۔
خان نے کہا، ’’کشمیر بے پناہ خوبصورتی، شاندار روایات اور گہرے ثقافتی جذبات کا حامل ہے۔ اس ثقافت کا احترام اور تحفظ ضروری ہے۔ ہر شہری، سیاسی رہنما اور سیاسی جماعت کو ان جذبات کا احترام کرنا چاہئے۔ جموں و کشمیر کو ایک خصوصی خطے کے طور پر دیکھا جانا چاہئے، جس کی تاریخی حیثیت اس امر کی گواہ ہے۔‘‘
اکبر خان نے کہا، ’’میں اور میرے بھائی یہاں بہت سا قیمتی وقت گزار چکے ہیں۔ میں کشمیر کی خوبصورت تاریخ سے گہرا تعلق محسوس کرتا ہوں۔ یہ پھولوں کے ایک ایسے قیمتی گلدستے کی مانند ہے جسے ہر کوئی اپنے نام کرنا چاہتا رہا ہے۔‘‘
انہوں نے مزید کہا، ’’تاریخی اور قدرتی طور پر ہمارا کشمیر بھارت کا اٹوٹ حصہ ہے۔ ہم چاہتے ہیں کہ بھارت آگے بڑھے، لیکن اس کے ساتھ کشمیر کے جذبات، اس کی ثقافت اور نوجوانوں کی امنگوں کو بھی ساتھ لے کر چلے۔ ہمیں سب کو مل کر آگے بڑھنا ہوگا۔ یہی میرا نقطۂ نظر ہے۔‘‘
افتتاحی فلم فیسٹیول میں بھارتی اور بین الاقوامی سینما پیش کیا جارہا ہے، جبکہ فلم سازوں، فنکاروں اور مقامی صلاحیتوں کو پلیٹ فارم فراہم کرنے کے ساتھ ساتھ جموں و کشمیر کے ثقافتی ورثے، کھانوں اور سیاحتی امکانات کو بھی اجاگر کیا جارہا ہے۔
۔۔۔۔۔۔(ندائے مشر ق ڈیسک)
