جموں/۷ستمبر
جموں و کشمیر پولیس نے پیر کو کٹھوعہ ضلع میں بین الریاستی منشیات اسمگلنگ نیٹ ورک کا پردہ فاش کرتے ہوئے چار افراد کو گرفتار کرلیا اور ان کے قبضے سے۲ء۶۷۲ کلو گرام افیون برآمد کی، حکام نے بتایا۔
مصدقہ اطلاع کی بنیاد پر کارروائی کرتے ہوئے لَکھن پور پولیس اسٹیشن کی ایک ٹیم نے شمشان گھاٹ کے قریب بائی پاس روڈ پر ناکہ لگایا اور ایک ٹرک کو روک کر اس کی تلاشی لی۔
تلاشی کے دوران گاڑی سے۱ء۰۲۶کلو گرام افیون برآمد ہوئی۔ پولیس نے ٹرک ڈرائیور گُروِندر سنگھ، ساکن ترن تارن ضلع پنجاب، اور اس کے ساتھی سکھ دیو سنگھ، جو ترن تارن کا ہی رہنے والا ہے، کو گرفتار کرلیا۔
حکام کے مطابق پوچھ گچھ کے دوران سکھ دیو سنگھ نے انکشاف کیا کہ منشیات کی یہ کھیپ گجرات سے روانہ ہوئی تھی اور راجستھان میں ایک نامعلوم شخص نے اسے حوالے کی تھی۔ اسے یہ کھیپ پنجاب میں ایک شخص تک پہنچانی تھی۔
اس انکشاف کی بنیاد پر پولیس ٹیم نے پٹھان کوٹ کے نکی گاؤں میں ایک مقام پر چھاپہ مارا، جہاں کھیپ کے مطلوبہ وصول کنندہ راکیش کمار کا سراغ لگایا گیا۔
پولیس کے مطابق منشیات کا پیکٹ راکیش کمار کے پڑوسی اجے کمار کے گھر میں چھپایا گیا تھا۔
مکان کی تلاشی کے دوران مزید منشیات برآمد کی گئی، جس کے بعد ضبط کی گئی افیون کی مجموعی مقدار۲ء۶۷۲کلو گرام ہوگئی۔ پولیس نے راکیش کمار اور اجے کمار کو بھی گرفتار کرلیا۔
لَکھن پور پولیس اسٹیشن میں این ڈی پی ایس ایکٹ کے تحت مقدمہ درج کرلیا گیا ہے اور بین الریاستی منشیات نیٹ ورک کے آگے اور پیچھے کے روابط کا پتہ لگانے کے لیے مزید تحقیقات جاری ہیں۔
حکام نے بتایا کہ یہ کارروائی کٹھوعہ کی ایس ایس پی موہیتا شرما کی مجموعی نگرانی میں انجام دی گئی، جبکہ پولیس ٹیم کی قیادت ایس ایچ او لَکھن پور نے کی اور اعلیٰ پولیس افسران نے کارروائی کی نگرانی کی۔
۔۔۔۔۔۔۔ایجنسیاں
