کیٹلی کرکٹ آسٹریلیا کی ’نیشنل ڈیولپمنٹ لیڈ‘ مقرر

سڈنی، 4 ستمبر (یواین آئی) آسٹریلیا میں خواتین کی کرکٹ کی اگلی نسل تیار کرنے کے لیے لیزا کیٹلی کو کرکٹ آسٹریلیا کی ’نیشنل ڈیولپمنٹ لیڈ‘ مقرر کیا گیا ہے۔ کیٹلی نے آسٹریلیا کے لیے نو ٹیسٹ، 82 ون ڈے اور ایک ٹی-20 میچ کھیلا ہے اور وہ ماضی میں آسٹریلیا اور انگلینڈ، دونوں ٹیموں کی ہیڈ کوچ رہ چکی ہیں۔
وہ اس وقت ویمنز بگ بیش لیگ (ڈبلیو بی بی ایل) میں سڈنی تھنڈر کی ہیڈ کوچ ہیں اور جون میں انہوں نے اپنے معاہدے میں مزید دو سال کی توسیع کی تھی۔ اس کے علاوہ وہ ویمنز پریمیئر لیگ (ڈبلیو پی ایل) میں ممبئی انڈینز اور ’دی ہنڈریڈ‘ میں ایم آئی لندن کی بھی کوچ ہیں۔ کرکٹ آسٹریلیا میں نئی ذمہ داری کے ساتھ وہ سڈنی تھنڈر کی کوچنگ جاری رکھیں گی، تاہم امکان ہے کہ وہ ڈبلیو پی ایل میں ممبئی انڈینز کی کوچ کی ذمہ داری چھوڑ دیں گی۔ ’دی ہنڈریڈ‘ میں ان کے مستقبل کا فیصلہ ابھی نہیں ہوا ہے۔
شارلٹ ایڈورڈز کے انگلینڈ کی ہیڈ کوچ بننے کے بعد کیٹلی گزشتہ سال ممبئی انڈینز سے وابستہ ہوئی تھیں۔ گزشتہ سیزن میں ٹیم آٹھ میچوں میں تین کامیابیوں کے ساتھ چوتھے نمبر پر رہی اور پہلی مرتبہ پلے آف میں جگہ نہیں بنا سکی۔
کیٹلی نے کہا، ’’میں اس ذمہ داری کو سنبھالنے اور آسٹریلوی کرکٹ کے مستقبل میں اپنا کردار ادا کرنے کے لیے بہت پُرجوش ہوں۔ میں خوش قسمت رہی ہوں کہ مجھے کھیل کے ہر سطح پر کھلاڑیوں اور کوچوں کے ساتھ کام کرنے کا موقع ملا۔ میں نے ایک بات سیکھی ہے کہ ٹیلنٹ کو آگے بڑھانے اور نکھارنے کے لیے مضبوط راستے اور مناسب رہنمائی کتنی اہم ہوتی ہے۔‘‘
انہوں نے کہا، ’’میری توجہ ملک بھر کے کھلاڑیوں، کوچوں اور اسٹاف کی معاونت، مثبت ماحول پیدا کرنے اور یہ یقینی بنانے پر ہوگی کہ لوگوں کو اپنی بہترین کارکردگی دکھانے کے لیے ضروری مواقع اور تعاون حاصل ہو۔‘‘
کرکٹ آسٹریلیا میں نیشنل ڈیولپمنٹ کی سربراہ سونیا تھامسن نے کہا، ’’ہم لیزا کا آسٹریلوی کرکٹ میں دوبارہ خیرمقدم کرتے ہوئے خوش ہیں۔ لیزا اس عہدے کے لیے وسیع تجربہ لے کر آئی ہیں، کیونکہ انہوں نے اپنے کوچنگ کیریئر کے دوران بین الاقوامی، ڈومیسٹک اور ڈیولپمنٹ پروگراموں میں کام کیا ہے۔‘‘
انہوں نے کہا کہ کیٹلی کھلاڑیوں اور دیگر افراد کو آگے بڑھانے اور انہیں اپنی صلاحیت تک پہنچنے میں مدد دینے کے لیے بہت پُرجوش رہتی ہیں اور یہی خوبی انہیں اس ذمہ داری کے لیے موزوں بناتی ہے۔