نیپال سیلاب سانحہ: ہلاکتوں کی تعداد بڑھ کر 626 ہوئی، تقریباً 2,000 افراد لاپتہ

کٹھمنڈو28اگست (یو این آئی) نیپال میں بدھ کے روز شدید سیلاب کی آفت کے باعث مرنے والوں کی تعداد بڑھ کر 626 ہو گئی ہے جب کہ حادثے کا شکار ہونے والے تقریباً دو ہزار افراد کے بارے میں کوئی معلومات نہیں مل سکیں۔
نیپال کے محکمہ موسمیات کے حکام نے کہا ہے کہ وہ اب دو اور گلیشیروں پر نظر رکھنے کی کوشش کر رہے ہیں۔ یہ گلیشیر اوسی گلیشیر کے پاس ہیں جس کے ٹوٹنے سے بدھ کو خوفناک سیلاب آیا تھا۔ ‘نیشنل ڈیزاسٹر رسک ریڈکشن اینڈ مینجمنٹ اتھارٹی کی تازہ ترین معلومات کے مطابق امدادی اور بچاؤ کی کارروائیوں کے درمیان اب تک تقریباً 4,000 افراد کو محفوظ مقامات پر پہنچایا جا چکا ہے، تاہم لاپتہ افراد کی تعداد میں مسلسل اضافہ ہو رہا ہے اور تازہ ترین اعداد و شمار کے مطابق 1,924 افراد ابھی بھی لاپتہ ہیں۔ تلاش اور بچاؤ آپریشن کو تیز کرنے کے لیے نیپال فوج، پولیس اور مسلح پولیس فورس کے 15,000 سے زائد سیکیورٹی اہلکاروں کو تعینات کیا گیا ہے۔
لاپتہ افراد میں غیر ملکی شہریوں کی تعداد کے بارے میں مختلف اعداد و شمار سامنے آئے ہیں۔ ایک سرکاری رپورٹ کے مطابق، لاپتہ افراد میں 517 غیر ملکی شہری اور پن بجلی منصوبوں میں کام کرنے والے ملازمین شامل ہیں۔ اس سے قبل نیپال پولیس کی جانب سے جاری کردہ اعداد و شمار میں لاپتہ غیر ملکی شہریوں کی تعداد 575 بتائی گئی تھی، جس میں 36 ممالک کے شہری شامل ہیں۔ پولیس ڈیٹا کے مطابق، لاپتہ غیر ملکیوں میں 65 امریکی، 62 یوکرینی اور 33 برطانوی شہری بھی شامل ہیں۔ اس کے علاوہ متاثرہ علاقوں سے 149 نیپالی سیاح اور 1,407 مقامی شہری بھی لاپتہ بتائے گئے ہیں۔ انتظامیہ اور سیکورٹی فورسز متاثرہ علاقوں میں جنگی بنیادوں پر امداد اور بچاؤ کے کاموں میں مصروف ہیں۔
اس دوران نیپال میں انسانی امداد پہنچا رہا ہندوستان کا تیسرا طیارہ دس ٹن امدادی سامان لے کر جمعہ کو کاٹھمنڈو روانہ ہو گیا۔ وزیر خارجہ ایس جے شنکر نے سوشل میڈیا ایکس پر ایک پوسٹ میں یہ اطلاع دی۔ انہوں نے کہا، "دس ٹن انسانی امداد لے کر تیسری پرواز کاٹھمنڈو کے لیے روانہ ہو گئی ہے۔ اس امداد میں پورٹیبل جنریٹر سیٹ، ڈگنیٹی کٹ، خوراک کے پیکٹ اور پانی کو پاک کرنے والی گولیاں شامل ہیں۔ سرنگ کے بچاؤ کے آپریشنز کے لیے ڈاکٹروں، پیرامیڈیکس اور ریکی ٹیم کے 11 اراکین کی ایک ٹیم بھی طیارے میں سوار ہے۔ ہندوستان نیپال کی امدادی اور بچاؤ کی کوششوں میں مسلسل تعاون کر رہا ہے۔” قابل ذکر ہے کہ اب تک دو طیاروں میں بالترتیب دس ٹن اور 37.5 ٹن امدادی سامان بھیجا جا چکا ہے اور تیسرے طیارے سے 12 سے 13 ٹن امدادی سامان بھیجا گیا ہے۔
میڈیا بریفنگ سے خطاب کرتے ہوئے، وزارت خارجہ کے ترجمان رندھیر جیسوال نے کہا کہ نیپال میں تباہ کن سیلاب کے بعد وہاں تقریباً 320 ہندوستانی شہری لاپتہ ہیں جبکہ 21 ہندوستانی شہریوں کو اب تک محفوظ طریقے سے وطن واپس لایا جا چکا ہے۔ جبکہ چین کی طرف موجود 400 ہندوستانی شہری محفوظ ہیں۔ جمعرات کو تریشولی توانائی منصوبے میں پھنسے 63 افراد کو بچا لیا گیا تھا۔ کاٹھمنڈو میں ہندوستانی سفیر نے ان سے ملاقات کی ہے۔ اس کے علاوہ 96 ہندوستانی شہری چین کے علاقے سے زمینی راستے سے نیپال کی طرف محفوظ طریقے سے پہنچ چکے ہیں۔ ان تمام لوگوں کو وطن واپس لانے کے لیے حکومت انتظامات کر رہی ہے۔ انہوں نے کہا کہ چین کے علاقے میں ابھی بھی تقریباً 400 ہندوستانی شہری موجود ہیں لیکن وہ تمام محفوظ ہیں اور ان کے اہل خانہ نیز ہندوستانی سفارت خانے سے ان کی بات ہوئی ہے کیونکہ وہاں موبائل نیٹ ورک کام کر رہا ہے۔ اس علاقے میں بھی لینڈ سلائیڈنگ ہوئی ہے اور راستوں کی خرابی کی وجہ سے ان کی واپسی میں وقت لگ سکتا ہے۔ حکومت انہیں وطن واپس لانے کے انتظامات کر رہی ہے۔
ترجمان نے کہا کہ اس کے علاوہ ہندوستانی نژاد کے 100 اور افراد لاپتہ ہیں جو مختلف ممالک کے رہنے والے ہیں۔ ممکن ہے کہ یہ لوگ کیلاش مانسروور یاترا کے لیے گئے ہوں۔ ایک سوال کے جواب میں انہوں نے کہا کہ ابھی تک صرف لاپتہ افراد کا ڈیٹا ملا ہے اور کسی ہندوستانی شہری کی موت کی تصدیق نہیں کی جا سکی ہے۔
ترجمان نے کہا کہ نیپال کی درخواست کے مطابق ایک سرنگ ریسکیو ٹیم بھیجنے کی تیاری کر رہے ہیں، جس کے لیے ضروری سامان وغیرہ کا جائزہ لینے کے لیے پہلے ایک ریکی ٹیم بھیجی جا رہی ہے۔ ایک میڈیکل ٹیم بھی بھیجی جا رہی ہے۔ ہندوستان نے متعلقہ تکنیکی ٹیموں کے ساتھ بیلی برج کی بھی پیشکش کی ہے، تاکہ نیپال کے متاثرہ حصوں میں مواصلاتی نظام کو جلد بحال کیا جا سکے۔ ایک بیلی برج پہلے سے ہی نیپال میں موجود ہے اور اسے امدادی کوششوں کے لیے تعینات کیا جا سکتا ہے۔ مسٹر جیسوال نے کہا کہ ہندوستان نے نیپال کے حکام کو این ڈی آر ایف ٹیموں کو ان کے
متعلقہ سامان کے ساتھ بھیجنے کی بھی خصوصی پیشکش کی ہے، جو تلاش اور بچاؤ کی کارروائیوں میں مدد کر سکتی ہیں اور سانحے سے متاثرہ افراد تک امداد پہنچا سکتی ہیں۔ اس سلسلے میں نیپال حکومت کے جواب کا انتظار ہے۔ انہوں نے کہا کہ ہندوستان نیپال کی درخواست پر کوئی بھی دیگر امداد فراہم کرنے کے لیے تیار ہے۔
نیپالی سائنسدانوں کا کہنا ہے کہ انہیں ملنے والی کچھ تصویروں میں گلیشیروں پر دراڑیں دکھائی دے رہی ہیں لیکن ان دراڑوں کا مطلب یہ نہیں ہے کہ گلیشیر جلد ہی ٹوٹ جائے گا؛ ہو سکتا ہے کہ یہ دراڑیں گلیشیر میں پہلے سے ہی موجود رہی ہوں۔
نیپال کے محکمہ جل سائنس اور موسمیات کے ایک سینئر افسر نے بی بی سی کو بتایا، "لیکن پاس کے گلیشیر کے ساتھ جو ہوا ہے، اسے دیکھتے ہوئے ہم ان پر جتنا ہو سکے نظر رکھنے کی کوشش کر رہے ہیں۔” انہوں نے کہا کہ وہ چین کی طرف سے شیئر کی گئی ڈرون تصویروں کی جانچ کر رہے ہیں۔ یہ تصویریں ماؤنٹ لانگ تانگ لیرونگ کے شمالی حصے میں گلیشیر کے ٹوٹنے والی جگہ اور اس کے آس پاس لی گئی تھیں۔ یہ پہاڑ سرحد کے نیپال والے حصے میں ہے۔
ہمالیہ سے جڑے خطرات پر کام کرنے والی بین الاقوامی تنظیم ‘انٹرنیشنل سینٹر فار انٹیگریٹڈ ماؤنٹین ڈیولپمنٹ’ کے ماہرین کا کہنا ہے کہ دو دیگر گلیشیر بھی اسی لنڈے ندی میں پانی پہنچاتے ہیں جس میں سیلاب آیا تھا۔ اس تنظیم میں آب و ہوا اور ماحولیاتی خطرات کے شعبے کے سربراہ کیانگ گونگ ژانگ نے کہا، "سیٹلائٹ تصویروں سے پتہ چلتا ہے کہ ان میں سے ایک گلیشیر میں برف کے ایسے حصے ہو سکتے ہیں جو لٹکے ہوئے ہیں (ہینگنگ گلیشیر)۔ ان کی نگرانی اور جانچ ضروری ہے۔”
سائنسدانوں کا کہنا ہے کہ لٹکے ہوئے گلیشیر زیادہ خطرناک ہو سکتے ہیں کیونکہ وہ پہاڑ کی کھڑی ڈھالوں سے چپکے ہوتے ہیں – بعینہ ویسے ہی جیسے ٹوٹے ہوئے گلیشیر کا ایک حصہ تھا۔