میلبورن رینیگیڈز نے ٹوئننگ کو ڈبلیو بی بی ایل کا نیا کوچ مقرر کیا

میلبورن، 14 اگست (یواین آئی) میلبورن رینیگیڈز نے آسٹریلیا کی خواتین ٹیم کے اسسٹنٹ کوچ گیون ٹوئننگ کو آئندہ ویمنز بگ بیش لیگ (ڈبلیو بی بی ایل) سیزن کے لیے اپنا ہیڈ کوچ مقرر کیا ہے۔
ٹوئننگ اکتوبر میں بنگلہ دیش اور نیوزی لینڈ کے خلاف آسٹریلیا کی سیریز مکمل ہونے کے بعد رینیگیڈز سے وابستہ ہوں گے اور ڈبلیو بی بی ایل سیزن کے اختتام کے بعد قومی ٹیم میں اپنی ذمہ داری دوبارہ سنبھال لیں گے۔ انہوں نے قومی ٹیم کے ساتھ اپنے دور میں رینیگیڈز اور آسٹریلیا کی کپتان سوفی مولینکس کے ساتھ بھی کام کیا ہے۔
رینیگیڈز کے ہائی پرفارمنس مینیجر کلنٹ میکے ٹی20 اسپرنگ چیلنج کے دوران ٹیم کی ذمہ داری سنبھالیں گے۔ ٹوئننگ نے سائمن ہیلمٹ کی جگہ لی ہے، جنہوں نے آف سیزن کے دوران دوسری فرنچائز کے ساتھ کام کرنے کے لیے عہدہ چھوڑ دیا تھا۔
رینیگیڈز کے جنرل مینیجر میکس ایبٹ نے کہا کہ ٹوئننگ ٹیم کے لیے بہترین انتخاب ہیں اور اپنے ساتھ عالمی کپ جیتنے کا تجربہ لے کر آ رہے ہیں۔ انہوں نے کہا کہ ٹیم میں پہلے ہی مثبت ماحول موجود ہے اور ٹوئننگ اس ماحول کو مزید بہتر بنانے کے لیے موزوں شخص ہیں۔
ٹوئننگ نے کہا کہ رینیگیڈز کی بنیاد مضبوط ہے اور ٹیم میں باصلاحیت کھلاڑی موجود ہیں۔ انہوں نے کہا کہ وہ کھلاڑیوں کی ترقی اور کلب کی کامیابی میں مزید اضافہ کرنے کے لیے پرجوش ہیں اور آسٹریلیائی ٹیم کے ساتھ عالمی کپ کے تجربات کو رینیگیڈز کے ماحول میں بروئے کار لانا چاہتے ہیں۔