تنزید حسن کی سنچری، بنگلہ دیش نے 153 رنوں کی برتری حاصل کر لی

ڈارون (آسٹریلیا)، 14 اگست (یو این آئی) تنزید حسن (101) اور کپتان نجم الحسن شانتو (84) رنوں کی اننگز کی بدولت بنگلہ دیش نے پہلے ٹیسٹ میچ کے دوسرے دن جمعہ کو آسٹریلیا کے خلاف اسٹمپ تک چھ وکٹ پر 351 رن بنا کر 153 رنوں کی برتری حاصل کر لی ہے۔
بنگلہ دیش نے کل کے 96 رن پر ایک وکٹ سے آگے کھیلنا شروع کیا۔ آج صبح کے سیشن میں جوش ہیزلووڈ نے مومن الحق (49) کو آؤٹ کر کے آسٹریلیا کو دن کی پہلی کامیابی دلائی۔ اس کے بعد بلے بازی کے لیے آئے نجم الحسن شانتو نے تنقید حسن کے ساتھ اننگز کو سنبھالا۔ دونوں بلے بازوں نے صبر آزما بلے بازی کا مظاہرہ کرتے ہوئے رن بنائے۔ دونوں بلے بازوں کے درمیان تیسرے وکٹ کے لیے 93 رنوں کی شراکت داری ہوئی۔ اسی دوران تنقید حسن نے اپنی سنچری مکمل کی۔ انہوں نے سنچری مکمل کرنے کے لیے 188 گیندوں کا سامنا کیا۔ انہوں نے 197 گیندوں میں 101 رنوں کی اننگز میں آٹھ چوکے اور ایک چھکا لگایا۔ انہیں 66ویں اوور میں نیتھن لائن نے آؤٹ کیا۔ اس کے ساتھ ہی وہ آسٹریلیائی زمین پر ٹیسٹ سنچری بنانے والے پہلے بنگلہ دیشی بلے باز بن گئے ہیں۔
83ویں اوور میں ہیزلووڈ نے نجم الحسن شانتو کو آؤٹ کر کے بنگلہ دیش کو چوتھا جھٹکا دیا۔ نجم الحسن شانتو نے 126 گیندوں میں سات چوکے اور ایک چھکا لگاتے ہوئے 84 رن بنائے۔ اس کے بعد 85ویں اوور میں لٹن کمار داس بغیر کھاتا کھولے ہی پویلین لوٹ گئے۔ اگلے ہی اوور میں پیٹ کمنز نے مشفق الرحیم (36) رن کا شکار کر لیا۔ دن کا کھیل ختم ہونے کے وقت بنگلہ دیش نے 110 اووروں میں چھ وکٹ پر 351 رن بنا لیے ہیں۔ مہدی حسن معراج (ناقابل شکست 32) اور حسن محمود (ناقابل شکست 13) رن کریز پر موجود ہیں۔
آسٹریلیا کی جانب سے جوش ہیزلووڈ اور مچل اسٹارک نے دو دو وکٹ لیے۔ نیتھن لائن اور پیٹ کمنز نے ایک ایک بلے باز کو آؤٹ کیا۔