سری لنکا نے خواتین ٹی20 ایشیا کپ کے لیے مِتالی ایودھیا کو ٹیم میں واپس بلایا

کولمبو، 13 اگست (یواین آئی) سری لنکا نے رواں ماہ کے آخر میں دبئی میں ہونے والے خواتین ٹی20 ایشیا کپ کے لیے دائیں ہاتھ کی تیز گیندباز مِتالی ایودھیا کو ٹیم میں واپس بلایا ہے، جبکہ لیگ اسپن آل راؤنڈر دیومی وہانگا کو پہلی بار ٹی20 ٹیم میں شامل کیا گیا ہے۔
سلیکٹرز نے وہانگا اور ایودھیا کے علاوہ تیز گیندباز چیتنا وِمُکتی کو بھی ٹیم میں واپس بلایا ہے، جو گزشتہ ماہ پاکستان کے خلاف ون ڈے ٹیم کا حصہ تھیں۔ ٹیم سے باہر ہونے والوں میں تیز گیندباز ملکی مادارا، سیم بولنگ آل راؤنڈر رشْمیکا سیوَندی اور بائیں ہاتھ کی اسپنر نیماشہ میپیج شامل ہیں۔ ٹیم کی قیادت چماری اتاپٹو کریں گی جبکہ ہرشیتا سماراوکرما نائب کپتان ہوں گی۔
17 سالہ سنجنا کاوندی اور ایمیشا دلانی نے بھی ٹیم میں اپنی جگہ برقرار رکھی ہے۔ سلِنگی ایکشن سے گیند کرنے والی ایودھیا ٹی20 عالمی کپ کی ٹیم کا حصہ تھیں۔ وہانگا نے سری لنکا کے لیے 12 ون ڈے کھیلے ہیں۔ انہوں نے رواں سال کے آغاز میں سری لنکا کے ڈومیسٹک ٹی20 ٹورنامنٹ ویمنز نیشنل سپر لیگ میں آٹھ وکٹیں حاصل کی تھیں۔ گزشتہ ماہ پاکستان کے خلاف دو ون ڈے میچوں میں بھی وہ ٹیم کا حصہ تھیں، تاہم انہیں کوئی وکٹ نہیں ملی۔
ایشیا کپ کے گروپ ’بی‘ میں سری لنکا کو بنگلہ دیش، انڈونیشیا اور متحدہ عرب امارات (یو اے ای) کے ساتھ رکھا گیا ہے۔ دفاعی چیمپئن سری لنکا 29 اگست کو یو اے ای کے خلاف اپنے پہلے میچ سے خطاب کے دفاع کی مہم شروع کرے گا۔ سری لنکا نے 2024 میں دمبولا میں فائنل میں ہندوستان کو شکست دے کر ایشیا کپ کا خطاب جیتا تھا۔
خواتین ٹی20 ایشیا کپ کے لیے سری لنکا کی ٹیم: چماری اتاپٹو (کپتان)، ایمیشا دلانی، سنجنا کاوندی، وِشمی گنارتنے، ہرشیتا سماراوکرما (نائب کپتان)، کاویشا دلہاری، نیلاکشی کا سلوا، ہاسینی پریرا، کوشینی نوتھیانگنا (وکٹ کیپر)، دیومی وہانگا، سگندھیکا کماری، چامودی پرابودھا، چیتنا وِمُکتی، کاویہ کاوندی اور مِتالی ایودھیا۔