سیاسی جماعتیں سیاست سے اوپر اٹھیں:کووند

نئی دہلی//
صدر رام ناتھ کووند نے ہفتہ کو سیاسی جماعتوں سے کہا کہ وہ قومی مفاد میں تعصب کی سیاست سے اوپر اٹھ کر فیصلہ کریں کہ لوگوں کی فلاح و بہبود کیلئے کیا ضروری ہے۔
پارلیمنٹ کے سنٹرل ہال میں ارکان پارلیمنٹ سے اپنے الوداعی خطاب میں، کووند نے امن اور ہم آہنگی کی قدر پر زور دیتے ہوئے کہا کہ لوگوں کو اپنے مقاصد کے حصول کے لیے مخالفت اور دباؤ بنانے کا حق ہے، لیکن ان کا طریقہ گاندھیائی ہونا چاہیے۔
ان کے تبصرے ایک ایسے وقت میں اہمیت اختیار کر رہے ہیں جب متعدد مسائل پر اپوزیشن کے احتجاج کی وجہ سے پارلیمانی کارروائی میں اکثر خلل پڑا ہے۔
کووند نے کہا کہ وہ ہمیشہ خود کو بڑے خاندان کا حصہ سمجھتے ہیں، جس میں ممبران پارلیمنٹ بھی شامل ہیں۔انہوں نے کہا کہ کسی بھی خاندان کی طرح بعض اوقات ان میں اختلافات ہو سکتے ہیں، لیکن انہیں ملک کے وسیع تر مفادات کے لیے مل کر کام کرنا چاہیے۔
نائب صدر ایم وینکیا نائیڈو، وزیر اعظم نریندر مودی اور لوک سبھا اسپیکر اوم برلا سبکدوش ہونے والے صدر کو الوداع کرنے کے لیے تقریب میں شامل ہوئے جن کی مدت اتوار کو ختم ہو رہی ہے۔
صدر منتخب دروپدی مرمو پیر کو ہندوستان کے ۱۵ویں صدر کے طور پر حلف لیں گی۔ وہ ملک کے اعلیٰ ترین آئینی عہدے پر فائز ہونے والی پہلی قبائلی شخصیت ہوں گی۔
کووند نے مرمو کو مبارکباد دی اور کہا کہ ان کی رہنمائی سے ملک کو فائدہ ہوگا۔انہوں نے کہا کہ وہ ہمیشہ ملک کے شہریوں کے شکر گزار رہیں گے کہ انہوں نے بطور صدر خدمات سرانجام دینے کا موقع دیا۔
اس دوران ملک کی۱۵ویں منتخب صدر دروپدی مرمو پیر کو صبح سوا دس بجے پارلیمنٹ کے سنٹرل ہال میں اپنے عہدے کا حلف لیں گی۔
ملک کے چیف جسٹس جج این وی رمنا مرمو کو حلف دلائیں گے جس کے بعد انہیں اکیس توپوں کی سلامی دی جائے گی۔
اس موقع پر سبکدوش ہونے والے صدر رام ناتھ کووند، راجیہ سبھا کے چیئرمین، وزیر اعظم، لوک سبھا کے اسپیکر، مرکزی کابینہ کے ارکان، تمام گورنرز، تمام وزرائے اعلیٰ، مختلف ممالک کے سفیر، اراکین پارلیمنٹ، سینئر سویلین اور فوجی افسران موجود ہوں گے ۔
حلف برداری کی تقریب سے پہلے سبکدوش ہونے والے صدر کووند اور نو منتخب صدر مسز مرمو ایک عظیم الشان روایتی قافلے میں پارلیمنٹ ہاؤس کے سنٹرل ہال پہنچیں گے ۔
حلف لینے کے بعد مرمو ممبران پارلیمنٹ سے خطاب کریں گی۔ تقریب کے اختتام کے بعد وہ راشٹرپتی بھون کے لیے روانہ ہوں گی جہاں صحن میں پہنچنے پر انہیں گارڈ آف سلامی دی جائے گی۔ اس کے بعد سبکدوش ہونے والے صدر سے بشکریہ ملاقات ہوگی۔
مرمو گزشتہ پیر کو ہوئے انتخابات کے بعد ملک کی ۱۵ویں صدر منتخب ہوئی ہیں۔