ٹی-20 ممبئی لیگ کی توسیع کے لیے ایم سی اے نے بولی طلب کی

ممبئی، 10 اگست (یو این آئی) ممبئی کرکٹ ایسوسی ایشن (ایم سی اے) نے ٹی-20 ممبئی لیگ کی توسیع کے لیے بولی طلب کی ہے۔ اسی کے ساتھ مردوں کی لیگ کے نو ٹیموں والے ٹورنامنٹ میں تبدیل ہونے کا راستہ صاف ہو گیا ہے۔
ایم سی اے کے مطابق نئی فرنچائز نوی ممبئی علاقے کی نمائندگی کرے گی، جس سے لیگ کی رسائی مزید بڑھے گی اور ممبئی نیز اس کے آس پاس کے علاقوں کے اور زیادہ کرکٹرز کو کھیلنے کا موقع ملے گا۔ یہ قدم جون میں ہوئے لیگ کے کامیاب چوتھے سیزن کے بعد اٹھایا گیا ہے۔ ایم سی اے نے ایک بیان میں کہاکہ ”اس سیزن میں فینس کی زبردست دلچسپی اور سخت مقابلہ دیکھنے کو ملا، جس سے ہندوستان کے اہم فرنچائز پر مبنی گھریلو ٹی-20 ٹورنامنٹس میں سے ایک کے طور پر لیگ کی پوزیشن اور مضبوط ہوئی ہے“۔
دلچسپی رکھنے والے لوگ 10 اگست سے 25 اگست 2026 تک صبح 11 بجے سے شام چھ بجے کے درمیان ممبئی کے چرچ گیٹ میں واقع وانکھیڑے اسٹیڈیم کے کرکٹ سینٹر میں ایم سی اے دفتر سے بولی کے دستاویزات حاصل کر سکتے ہیں۔