سال 2036 کے اولمپکس کی ہندستان میں میزبانی کی خواہش کے ساتھ وزیر ریکھا نے نکالی ’سنکلپ کانوڑ یاترا‘

دہرادون/ہریدوار، 10 اگست (یو این آئی) ہندستان سال 2036 میں اولمپک کھیلوں کی میزبانی کرے، اس عزم اور خواہش کے ساتھ اتراکھنڈ کی کھیل اور نوجوان بہبود امور کی وزیر ریکھا آریہ نے پیر کو ’اولمپک 2036 سنکلپ کانوڑ یاترا‘ کا آغاز کیا۔ یاترا کا افتتاح آج صبح 7:00 بجے ہریدوار میں واقع عالمی شہرت یافتہ ’ہر کی پیڑی‘ سے ہوا۔ جہاں کابینی وزیر محترمہ آریہ نے باقاعدہ پوجا ارچنا کے بعد ملک میں اولمپک کھیلوں کے کامیاب انعقاد کا عزم کرتے ہوئے گنگا جل اٹھایا۔
ہریدوار سے شروع ہونے والی یہ کانوڑ یاترا اپنے راستے پر آگے بڑھتے ہوئے رشی کیش کے ویر بھدر مہادیو مندر میں جل ابھیشیک کے ساتھ شام کو اختتام پذیر ہوگی۔ اس دوران کھیل وزیر کے ساتھ بڑی تعداد میں خواتین کھلاڑی، ایتھلیٹ اور مقامی شہری جوش و خروش کے ساتھ شامل ہیں۔
یاترا کے دوران ’ہر ہر مہادیو‘ اور ’بھارت ماتا کی جے‘ کے نعروں سے پورا راستہ گونج رہا ہے۔ راستے میں مختلف مقامات پر عقیدت مندوں اور کھیلوں سے محبت کرنے والوں کی جانب سے یاترا کا شاندار استقبال کیا جا رہا ہے۔ اس سنکلپ کانوڑ یاترا کا اختتام آج شام رشی کیش کے مشہور ویر بھدر مندر میں ہوگا، جہاں کھیل وزیر ریکھا آریہ بھگوان شیو کا مقدس گنگا جل سے جل ابھیشیک کرکے ہندستان کی جانب سے اولمپکس کی میزبانی کی کامیابی کی پراتھنا کریں گی۔