ویبھَو سوریہ ونشی کی توجہ ریڈ بال کرکٹ پر مرکوز

تلے گاؤں، 7 اگست (یو این آئی) نوجوان بلے باز ویبھَو سوریہ ونشی اب ریڈ بال کرکٹ پر اپنی توجہ مرکوز کیے ہوئے ہیں۔ گزشتہ ماہ زمبابوے کے دورے سے واپسی کے بعد سے وہ ناگپور کے قریب تلے گاؤں میں واقع راجستھان رائلز اکیڈمی میں اپنے ریڈ بال کھیل کو مزید نکھارنے میں مصروف ہیں۔
راجستھان رائلز کے سینٹر آف ایکسیلینس میں سوریہ ونشی اپنے چند ساتھی کھلاڑیوں کے ساتھ ملٹی ڈے فارمیٹ کی تیاری کر رہے ہیں۔ راجستھان رائلز کے اسسٹنٹ کوچ اور سابق ہندوستانی بیٹنگ کوچ وکرم راٹھور ان کی رہنمائی کر رہے ہیں۔
15 سالہ سوریہ ونشی، جنہوں نے گزشتہ آئی پی ایل سیزن میں سب سے زیادہ رنز بنائے تھے، کو عام طور پر وائٹ بال اسپیشلسٹ سمجھا جاتا ہے، تاہم وہ اس تاثر سے اتفاق نہیں کرتے اور ان کا کہنا ہے کہ وہ طویل فارمیٹ میں بھی یکساں طور پر مؤثر ہیں۔
فرنچائز نے اپنے کھلاڑیوں کے لیے 10 روزہ تربیتی کیمپ کا انعقاد کیا ہے، جس میں سوریہ ونشی کے علاوہ تشار دیش پانڈے، سندیپ شرما، شبھم دوبے، روی سنگھ اور سشانت مشرا بھی حصہ لے رہے ہیں۔ اس گروپ میں سوریہ ونشی اور دیش پانڈے دلیپ ٹرافی میں بالترتیب ایسٹ زون اور ویسٹ زون کی نمائندگی کریں گے، جبکہ سوریہ ونشی اپنی ٹیم کے نائب کپتان بھی ہیں۔ دلیپ ٹرافی کا آغاز 23 اگست سے بنگلورو میں ہوگا۔
فرنچائز کے مطابق کیمپ میں ہر کھلاڑی کے لیے انفرادی تربیتی پروگرام ترتیب دیا گیا ہے، جس میں تکنیکی مہارت، جسمانی فٹنس، ورک لوڈ مینجمنٹ، ریکوری اور کارکردگی کے تجزیے پر خصوصی توجہ دی جا رہی ہے تاکہ کھلاڑی گھریلو سیزن کے لیے مکمل طور پر تیار ہوں۔
اکیڈمی میں مختلف نوعیت کی مٹی سے تیار کردہ پریکٹس وکٹیں موجود ہیں، جو گھریلو کرکٹ میں مختلف حالات کی مشق کا موقع فراہم کرتی ہیں، جبکہ ریڈ بال کرکٹ کی تیاری کے لیے خصوصی سہولتیں بھی دستیاب ہیں۔
وکرم راٹھور نے کہا کہ سیزن کے آغاز سے پہلے کا وقت کھلاڑیوں کے لیے اپنی خامیوں پر کام کرنے اور کھیل کو بہتر بنانے کا بہترین موقع ہوتا ہے۔ ان کے مطابق سینٹر آف ایکسیلینس ہر کھلاڑی کی ضرورت کے مطابق تربیتی پروگرام ترتیب دینے کی سہولت فراہم کرتا ہے۔
فرنچائز کے آپریشنز ہیڈ رومی بھنڈر نے کہا کہ ہائی پرفارمنس سینٹر کا قیام طویل مدتی منصوبہ بندی کے تحت کیا گیا ہے تاکہ کھلاڑی سال بھر اپنی صلاحیتوں کو بہتر بنا سکیں اور ان کی ہمہ جہت کرکٹ ترقی کو یقینی بنایا جا سکے۔