جیت کا تسلسل برقرار رہے گا: آکاش نانگیا

نئی دہلی، 7 اگست (یو این آئی) دہلی پریمیئر لیگ (ڈی پی ایل) 2026 میں نیو دہلی ٹائیگرز کو 27 رن سے شکست دینے کے بعد پرانی دہلی 6 کے مالک آکاش نانگیا نے ٹیم کی کارکردگی پر اطمینان کا اظہار کرتے ہوئے کہا کہ ان کی ٹیم اس فتح سے حاصل ہونے والے اعتماد کو آئندہ بھی برقرار رکھے گی۔
آکاش نانگیا نے کہا، ’’سنٹرل دہلی کنگز کے خلاف شکست کے بعد ٹیم نے جس مضبوطی اور جذبے کے ساتھ واپسی کی، وہ کھلاڑیوں کے کردار اور خود اعتمادی کا ثبوت ہے۔ طویل ٹورنامنٹ میں شکست کے فوراً بعد واپسی کرنا انتہائی اہم ہوتا ہے اور ہماری ٹیم نے دباؤ کے لمحات میں شاندار کھیل پیش کیا۔‘‘
انہوں نے سلامی بلے باز آرین گور کی میچ وننگ اننگز کی تعریف کرتے ہوئے کہا، ’’آرین نے بہترین آغاز فراہم کرکے فتح کی مضبوط بنیاد رکھی۔ انہوں نے نہایت پختہ اور مثبت انداز میں بیٹنگ کی، جبکہ ہمارے گیندبازوں نے ہدف کا کامیابی سے دفاع کرتے ہوئے اپنی حکمت عملی پر مؤثر انداز میں عمل کیا اور پورے میچ کے دوران حریف ٹیم پر دباؤ برقرار رکھا۔‘‘
اس موقع پر سابق کرکٹر ہربھجن سنگھ کو دہلی اینڈ ڈسٹرکٹ کرکٹ ایسوسی ایشن (ڈی ڈی سی اے) کے صدر روہن جیٹلی نے اعزاز سے نوازا۔ ہربھجن سنگھ پرانی دلی 6 کی حوصلہ افزائی کے لیے اسٹیڈیم پہنچے تھے، جس سے لیگ کا جوش مزید بڑھ گیا۔
آکاش نانگیا نے ہربھجن سنگھ کا فرنچائز کی حمایت پر شکریہ ادا کرتے ہوئے کہا، ’’ہماری ٹیم کی سب سے بڑی طاقت یہ رہی ہے کہ مختلف مقابلوں میں مختلف کھلاڑیوں نے ذمہ داری نبھائی ہے۔‘‘ ان کا کہنا تھا کہ پورے ٹورنامنٹ میں اجتماعی کارکردگی اور تسلسل ہی کامیابی کی کنجی ہوگا۔ انہوں نے کہا کہ آئندہ میچوں میں بھی ٹیم کا ہدف اسی جیت کی رفتار کو برقرار رکھنا، ہر مقابلے کے ساتھ اپنی کارکردگی میں بہتری لانا اور پورے ٹورنامنٹ میں عمدہ کھیل کا مظاہرہ کرنا ہوگا۔
واضح رہے کہ جمعرات کو ارون جیٹلی اسٹیڈیم میں کھیلے گئے میچ میں پرانی دہلی 6 نے ہمہ جہت کارکردگی کا مظاہرہ کرتے ہوئے نیو دہلی ٹائیگرز کو 27 رن سے شکست دے کر ڈی پی ایل 2026 میں اپنی دوسری کامیابی حاصل کی۔