ورلڈ کپ 2027 کے لیے روی شاستری کی مجوزہ ہندوستانی ٹیم پر آکاش چوپڑا کا تبصرہ

نئی دہلی، 6 اگست (یو این آئی) سابق ہندوستانی ہیڈ کوچ روی شاستری کی جانب سے ورلڈ کپ 2027 کے لیے تجویز کردہ ہندوستانی ٹیم کو سابق کرکٹر آکاش چوپڑا نے دلچسپ قرار دیتے ہوئے کہا ہے کہ یہ ایک "ہٹ کے” (روایت سے ہٹ کر) ٹیم ہے۔
اکتوبر-نومبر 2027 میں جنوبی افریقہ، زمبابوے اور نمیبیا میں ہونے والے ورلڈ کپ میں ابھی 14 ماہ باقی ہیں، تاہم تمام ٹیموں نے اپنی تیاریوں کا آغاز کر دیا ہے۔
آکاش چوپڑا نے کہا کہ روی شاستری نے شبھمن گل کو کپتان، جبکہ روہت شرما، وراٹ کوہلی، شریاس ایئر، یشسوی جیسوال، کے ایل راہل اور رشبھ پنت کو اسکواڈ میں شامل کیا ہے۔ ان کے مطابق یشسوی جیسوال اور رشبھ پنت کا انتخاب خاصا دلچسپ ہے، کیونکہ کے ایل راہل پہلے ہی ٹیم میں موجود ہیں، جبکہ ایشان کشن بھی حالیہ دنوں میں اچھی فارم میں ہیں۔
بولنگ شعبے پر تبصرہ کرتے ہوئے چوپڑا نے کہا کہ جسپریت بمراہ، محمد سراج اور کلدیپ یادو کا انتخاب متوقع تھا، لیکن محمد شامی اور بھونیشور کمار دونوں کو ایک ساتھ شامل کرنا حیران کن فیصلہ ہے۔
انہوں نے کہا کہ روی شاستری نے رویندر جڈیجا، اکشر پٹیل، ہاردک پانڈیا، نتیش کمار ریڈی اور واشنگٹن سندر کو بھی جگہ دی ہے، جو تجربہ اور توازن کے لحاظ سے مناسب انتخاب ہے۔
آکاش چوپڑا نے اس مجوزہ ٹیم کو 10 میں سے 8 نمبر دیتے ہوئے کہا کہ امکان کم ہے کہ ورلڈ کپ کی حتمی ہندوستانی ٹیم بالکل اسی شکل میں ہو، جب تک کہ روی شاستری خود سلیکٹر نہ بن جائیں۔ ان کے مطابق اسکواڈ میں ایک بائیں ہاتھ کے تیز گیندباز کی کمی نمایاں ہے۔