پریکٹس کے دوران مائیکل نیسر زخمی

سڈنی، 5 اگست (یو این آئی) آسٹریلیا کے ایشیز ہیرو، تیز گیند باز مائیکل نیسر کی دائیں ٹانگ کی پنڈلی میں پریکٹس کے دوران کھنچاؤ آ گیا ہے، لیکن انہیں امید ہے کہ وہ اکتوبر میں جنوبی افریقہ کے دورے کے لیے فٹ ہو جائیں گے۔
مسٹر نیسر کو بنگلہ دیش کے خلاف گھریلو دو ٹیسٹ میچوں کی سیریز کے لیے آسٹریلیا کی 13 رکنی ٹیم میں شامل نہیں کیا گیا تھا، کیونکہ پیٹ کمنز اور جوش ہیزل ووڈ چوٹ سے ابھر کر ٹیم میں واپس آ گئے تھے۔ یہ سیریز اگلے جمعرات کے روز ڈارون میں شروع ہو رہی ہے۔
نیسر ایشیز میں ایک ہیرو بن کر ابھرے تھے۔ انہوں نے 19.93 کی اوسط سے 15 وکٹیں حاصل کی تھیں، جس میں گابا میں اپنے ہوم گراؤنڈ پر پہلی بار ٹیسٹ میچ کی ایک اننگز میں پانچ وکٹیں لینا اور میلبورن و سڈنی میں دو بار چار چار وکٹیں لینا شامل تھا۔
وہ مکمل طور پر ٹریننگ کر رہے تھے اور بنگلہ دیش سیریز کے لیے اسٹینڈ بائی پر تھے، تاکہ اگر چار اہم تیز گیند بازوں میں سے کسی کو چوٹ لگتی، تو وہ ان کی جگہ لے سکیں۔ لیکن اس ہفتے رننگ سیشن کے دوران ان کی پنڈلی میں چوٹ لگ گئی۔ اب انہیں ٹھیک ہونے کے لیے ایک مہینے کے ری ہیب کی ضرورت ہوگی، جس کے بعد وہ جنوبی افریقہ کے دورے سے پہلے اپنی بولنگ پریکٹس دوبارہ شروع کر سکیں گے۔ اس دورے پر ان کے پاس اکتوبر میں مسلسل ہونے والے ٹیسٹ میچوں کے لیے پانچ یا چھ تیز گیند بازوں پر مشتمل ٹیم کا حصہ بننے کا اچھا موقع ہوگا۔