ایئر انڈیا طبی فضائی لاجسٹکس کے لیے ای وی ٹی او ایل طیاروں کے استعمال کا مطالعہ کرے گی

نئی دہلی، 31 جولائی (یو این آئی) ٹاٹا گروپ کی فضائی کمپنی ایئر انڈیا نے طبی فضائی لاجسٹکس کے لیے الیکٹرک ورٹیکل ٹیک آف اینڈ لینڈنگ طیاروں کے استعمال کے امکانات کا جائزہ لینے کے لیے سوزوکی موٹر کارپوریشن اور اسکائی ڈرائیو کے ساتھ ایک مفاہمتی یادداشت (ایم او یو) پر دستخط کیے ہیں۔
جاپانی کمپنی سوزوکی موٹر کارپوریشن ہندوستان میں ماروتی کے اشتراک سے اور آزادانہ طور پر بھی گاڑیاں تیار کرتی ہے، جبکہ اسکائی ڈرائیو ای وی ٹی او ایل طیاروں کی تیاری، ترقی اور فروخت کے شعبے میں سرگرم ہے۔
ایئر انڈیا کی جانب سے جمعہ کو جاری بیان کے مطابق تینوں کمپنیاں مشترکہ طور پر ہندوستان میں طبی فضائی لاجسٹکس کے لیے ای وی ٹی او ایل طیاروں کے استعمال کے امکانات کا مطالعہ کریں گی۔ ابتدائی مرحلے میں ایئر انڈیا ہوائی اڈوں سے متعلق بنیادی ڈھانچے اور آپریشنل معاونت فراہم کرے گی۔
مستقبل میں ایئر انڈیا کی جانب سے طبی ای وی ٹی او ایل خدمات کے باقاعدہ آپریشن شروع کرنے کے امکان سے متعلق سوال پر کمپنی کے ذرائع نے کہا کہ اس بارے میں فی الحال کچھ بھی واضح نہیں ہے۔
ملک کے بڑے شہروں میں بڑھتے ہوئے ٹریفک جام کے باعث ایسی طبی اشیا، جو جلد خراب ہو جاتی ہیں یا جن کی بروقت ترسیل انتہائی ضروری ہوتی ہے، ان کی فراہمی ایک بڑا چیلنج بنی ہوئی ہے۔
بیان کے مطابق اسکائی ڈرائیو کی ای وی ٹی او ایل ٹیکنالوجی، ایئر انڈیا کی آپریشنل مہارت اور سوزوکی کی بھارتی بازار سے متعلق گہری سمجھ کو یکجا کرتے ہوئے تینوں کمپنیاں ہنگامی طبی سامان کی آخری مرحلے تک تیز رفتار فضائی ترسیل کو ممکن بنانے کی سمت میں کام کریں گی۔