ایجنسیز
سرینگر؍۱۰جون
جموں کشمیر کے ضلع بارہمولہ کے اُوڑی سیکٹر میں منگل کے روز ایک حادثاتی گرینیڈ دھماکے میں دو فوجی جوان جاں بحق ہوگئے۔
سرکاری ذرائع کے مطابق اُڑی کے کمل کوٹ علاقے میں واقع ایک فوجی کیمپ میں معمول کے مطابق سازوسامان کی حوالگی کے دوران ایک ہینڈ گرینیڈ اچانک پھٹ گیا، جس کے نتیجے میں دو جوان شدید زخمی ہوگئے۔
حکام نے بتایا کہ زخمی جوانوں کو فوری طور پر علاج کے لیے فوج کے۹۲بیس ہسپتال، سری نگر منتقل کیا گیا، تاہم ڈاکٹروں نے انہیں ہسپتال پہنچنے پر مردہ قرار دے دیا۔
واقعے کے بعد قانون کے مطابق انکوائری کارروائی شروع کر دی گئی ہے تاکہ دھماکے کے حالات و اسباب کا تعین کیا جا سکے۔
دریں اثنا، سری نگر میں تعینات فوج کے دفاعی ترجمان نے کہا کہ متعلقہ حکام سے مکمل تفصیلات حاصل کرنے کے بعد ہی واقعے پر باضابطہ تبصرہ کیا جائے گا۔
فوجی ذرائع کے مطابق واقعے کی مزید تحقیقات جاری ہے۔
