آئی پی ایل فائنل میں بدتمیزی: ٹم ڈیوڈ پر میچ فیس کا 50 فیصد جرمانہ، ایک میچ کی پابندی عائد

احمد آباد، 2 جون (یواین آئی )رائل چیلنجرز بنگلورو (آر سی بی) کے جارح مزاج بلے باز ٹم ڈیوڈ کو احمد آباد کے نریندر مودی اسٹیڈیم میں گجرات ٹائٹنز کے خلاف کھیلے گئے ٹاٹا آئی پی ایل 2026 کے فائنل میچ کے دوران ضابطہ اخلاق کی خلاف ورزی مہنگی پڑ گئی۔ ٹم ڈیوڈ پر میچ فیس کا 50 فیصد جرمانہ عائد کیا گیا ہے اور ساتھ ہی انہیں دو ڈی میرٹ پوائنٹس بھی دیے گئے ہیں۔ یہ کارروائی کھلاڑیوں اور ٹیم آفیشلز کے لیے وضع کردہ آئی پی ایل ضابطہ اخلاق کے لیول 1 کی خلاف ورزی پر کی گئی ہے۔
ٹم ڈیوڈ کو آئی پی ایل ضابطہ اخلاق کے آرٹیکل 2.9 کی خلاف ورزی کا مرتکب پایا گیا، جو "میچ کے دوران کسی کھلاڑی، ٹیم آفیشل، امپائر، میچ ریفری یا کسی تیسرے شخص پر یا اس کے قریب نامناسب اور/یا خطرناک انداز میں گیند (یا کرکٹ کا کوئی دوسرا سامان، جیسے پانی کی بوتل یا آئس بیگ) پھینکنے” سے متعلق ہے۔
یہ واقعہ پہلی اننگز کے 10ویں اوور میں پیش آیا جب ایک وکٹ گرنے کے بعد، غصے میں بپھرے ٹم ڈیوڈ نے امپائر نتن مینن کی سمت جارحانہ انداز میں ایک آئس بیگ (آئس پیک) پھینکا۔ ٹم ڈیوڈ نے میچ کے بعد اپنی غلطی کا اعتراف کر لیا اور میچ ریفری جواگل سری ناتھ کی جانب سے سنائی گئی سزا کو قبول کر لیا ہے۔
موجودہ آئی پی ایل سیزن میں ٹم ڈیوڈ کی جانب سے لیول 1 کی یہ تیسری خلاف ورزی تھی۔ اس سے قبل انہوں نے میچ نمبر 20 میں پہلی خلاف ورزی (ایک ڈی میرٹ پوائنٹ) اور میچ نمبر 54 میں دوسری خلاف ورزی (دو ڈی میرٹ پوائنٹس) کی تھی۔
اس تازہ ترین واقعے کے بعد اب ان کے مجموعی ڈی میرٹ پوائنٹس کی تعداد 5 ہو گئی ہے، جس کے نتیجے میں ان پر ایک میچ کی پابندی لازمی ہو گئی ہے۔ اس سزا کے تحت، ٹم ڈیوڈ اگلے آئی پی ایل سیزن (2027) میں آر سی بی کے پہلے میچ، یا وہ جس بھی فرینچائز کی نمائندگی کریں گے، اس کے افتتاحی میچ کا حصہ نہیں بن سکیں گے۔