اننت ناگ؍۲جون
جنوبی کشمیر کے ضلع اننت ناگ میں جنگلات منڈی سے لال چوک جانے والی سڑک پر ایک درخت گرنے کے نتیجے میں ایک شخص جاں بحق جبکہ اس کی اہلیہ شدید زخمی ہو گئی۔
حکام کے مطابق میاں بیوی سڑک کے کنارے پیدل جا رہے تھے کہ اچانک ایک پرانا درخت جڑ سے اکھڑ کر ان پر آ گرا، جس کے باعث دونوں شدید زخمی ہو گئے۔ واقعے کے فوراً بعد انہیں علاج کے لیے قریبی اسپتال منتقل کیا گیا۔
تاہم زخمیوں میں شامل اتروس کے رہائشی محمد رفیق خان زخموں کی تاب نہ لاتے ہوئے دورانِ علاج دم توڑ گئے، جبکہ ان کی اہلیہ کی حالت تشویشناک بتائی جا رہی ہے اور وہ اسپتال میں زیرِ علاج ہیں۔
اس افسوسناک واقعے کے بعد مقامی لوگوں میں تشویش کی لہر دوڑ گئی۔ شہریوں نے انتظامیہ سے مطالبہ کیا ہے کہ سڑک کے دونوں جانب موجود پرانے اور ممکنہ طور پر خطرناک درختوں کا فوری معائنہ کیا جائے تاکہ مستقبل میں اس نوعیت کے حادثات سے بچا جا سکے۔
دریں اثنا، حکام نے واقعے کے اسباب اور حالات کی تحقیقات شروع کر دی ہے۔
