سرینگر؍۱۹؍اکتوبر
جموں کشمیر بورڈ آف اسکول ایجوکیشن (جے کے بوس) کے زیر اہتمام پیر کے روز دسویں جماعت کے امتحانات شروع ہوئے، جن میں۱۰۰۳؍امتحانی مراکز پر۹۷ ہزار سے زائد طلبہ نے شرکت کی۔
دسویں جماعت کے امتحانات وادی کشمیر اور جموں ڈویژن کے سرمائی زون میں شروع ہوئے۔
جے کے بوس کے حکام نے بتایا کہ سالانہ باقاعدہ دسویں جماعت کے امتحانات کا آغاز ہوا، جن میں۹۷ہزار سے زائد طلبہ۱۰۰۳؍ مراکز پر امتحان دے رہے ہیں۔حکام کے مطابق، ’’ان میں سے۷۲ہزار۲۳۲طلبہ نے کشمیر ڈویژن میں جبکہ۲۵ہزار۲۶۸طلبہ نے جموں ڈویژن کے سرمائی زون کے علاقوں میں اندراج کرایا ہے۔ بورڈ نے مجموعی طور پر۱۰۰۳؍امتحانی مراکز قائم کیے ہیں، جن میں۶۸۷ کشمیر ڈویژن اور۳۱۶جموں ڈویژن کے سرمائی زون میں واقع ہیں۔‘‘
جے کے بوس کے چیئرمین غلام حسن شیخ نے امتحانی مراکز کے دورے کے دوران نامہ نگاروں کو بتایا کہ امتحانات کشمیر ڈویژن کے۱۰؍اور جموں ڈویژن کے سات اضلاع میں منعقد کیے جا رہے ہیں، جبکہ لیہہ اور کرگل میں بھی چند طلبہ امتحانات میں شریک ہو رہے ہیں۔
چیئرمین نے بتایا کہ بورڈ کے دفتر میں ایک مخصوص امتحانی مرکز قائم کیا گیا ہے، جہاں خصوصی ضروریات کے حامل اہل امیدواروں کو رعایتیں فراہم کی جا رہی ہیں۔ انہوں نے کہا کہ اہل امیدواروں کو۲۰ منٹ کا اضافی وقت، معذوری کی نوعیت کے مطابق معاون کاتب اور کامیابی کے مقررہ معیار میں پانچ نمبروں کی رعایت دی گئی ہے۔
شیخ نے کہا، ’’ہم ان طلبہ کو سہولت فراہم کرنے اور ان کے تعلیمی خوابوں کو حقیقت میں بدلنے کے لیے اپنی پوری کوشش کرتے ہیں۔‘‘
بورڈ کے سربراہ نے مزید کہا کہ بورڈ نے امتحانات کے انتظامات پہلے ہی مکمل کر لیے تھے اور نظام کو بہتر بنانے اور امتحانات کے ہموار انعقاد کو یقینی بنانے کے لیے افسران، جوائنٹ سیکریٹریوں اور ڈپٹی سیکریٹریوں کے ساتھ تفصیلی تبادلۂ خیال کیا گیا تھا۔
وزیر تعلیم سکینہ ایتو نے دسویں، گیارہویں اور بارہویں جماعت کے امتحانات میں شرکت کرنے والے طلبہ کے لیے نیک خواہشات کا اظہار کرتے ہوئے کہا کہ جے کے بوس نے امتحانات کے پُرامن اور منظم انعقاد کے لیے ضروری تیاریاں مکمل کر لی ہیں۔
ایتو نے طلبہ پر زور دیا کہ وہ پُراعتماد رہیں، وقت کا دانش مندی سے استعمال کریں اور پُرسکون اور مثبت ذہن کے ساتھ امتحانات میں شریک ہوں۔
امتحانات میں شفافیت اور شکایات کے بروقت ازالے کو یقینی بنانے کے لیے جے کے بوس نے ایک شکایتی و نگرانی سیل بھی قائم کیا ہے۔
محکمہ اسکولی تعلیم کے کمشنر و سیکریٹری رام نیواس شرما نے بھی دسویں، گیارہویں اور بارہویں جماعت کے امتحانات میں شریک طلبہ کے لیے نیک خواہشات کا اظہار کیا۔
کمشنر و سیکریٹری نے چیف ایجوکیشن افسران اور کمپلیکس سربراہان پر زور دیا کہ وہ طلبہ کے لیے سازگار اور معاون ماحول کو یقینی بنائیں۔ انہوں نے کہا کہ امتحانات سے متعلق ذہنی دباؤ پر قابو پانے میں طلبہ کی مدد کے لیے مؤثر رہنمائی اور ضروری تعاون فراہم کیا جانا چاہیے۔
دسویں جماعت کے امتحانات پیر سے شروع ہوئے ہیں اور۱۸نومبر کو اختتام پذیر ہوں گے، جبکہ بارہویں جماعت کے سالانہ باقاعدہ امتحانات۲۱ ؍اکتوبر سے شروع ہو کر۲۱ نومبر تک جاری رہیں گے۔
۔۔۔۔۔۔(ویب ڈیسک)
