میں ثاقب اور ملنگا سے بہت کچھ سیکھ رہا ہوں: کمنس

حیدرآباد، 23 مئی (یو این آئی) پیٹ کمنس دنیا کے خطرناک ترین تیز گیندبازوں میں شمار کیے جاتے ہیں، لیکن انہوں نے اعتراف کیا ہے کہ آئی پی ایل 2026 کے دوران انہوں نے سن رائزرس حیدرآباد کے اپنے ساتھی گیندبازوں سے کافی کچھ سیکھا ہے۔
کمنس نے خاص طور پر ایشان ملنگا اور ثاقب حسین کا ذکر کیا، جنہوں نے پورے سیزن میں شاندار کارکردگی کا مظاہرہ کیا۔
ملنگا سن رائزرس حیدرآباد کے سب سے کامیاب وکٹ لینے والے گیندباز رہے ہیں، جنہوں نے 14 میچوں میں 19 وکٹ حاصل کیے، جبکہ ڈیبیو سیزن کھیلنے والے ثاقب نے 10 میچوں میں 15 وکٹ اپنے نام کیے ہیں۔
جمعہ کی شب رائل چیلنجرس بنگلورو کے خلاف سن رائزرس حیدرآباد کی 55 رن کی کامیابی میں ان دونوں گیندبازوں نے اہم کردار ادا کیا۔
آر سی بی کے ہدف کے تعاقب کے دوران دونوں نے اپنی سلوور گیندوں کا بہترین استعمال کیا اور مل کر آٹھ اوور میں 64 رن دے کر تین وکٹ حاصل کیے۔
ان دونوں کا مشترکہ اکانومی ریٹ 8.00 رہا، جو اس لحاظ سے زیادہ متاثر کن ہے کہ سن رائزرس حیدرآباد نے پہلے بلے بازی کرتے ہوئے 255/4 کا بڑا اسکور بنایا تھا۔
ملنگا اور ثاقب نے پاور پلے میں بھی اہم کردار ادا کیا۔ دونوں نے ابتدائی چھ اوور میں تین اوور ڈالے اور ایک ایک وکٹ حاصل کر کے آر سی بی کی جارحانہ شروعات پر بریک لگا دیا۔
میچ کے بعد کمنس نے کہا، ’’دونوں لاجواب رہے ہیں، میں نے بھی ان سے کافی کچھ سیکھا ہے۔ خاص طور پر ایشان نے پورے سیزن میں جس انداز سے گیندبازی کی، پاور پلے میں ان کی سلوور گیندیں اور مختلف انداز کمال کے رہے ہیں۔‘‘
انہوں نے کہا، ’’پھر ثاقب بھی ہیں، ایسے گیندباز کپتان کیلئے کسی خواب سے کم نہیں ہوتے۔‘‘
اس جیت کے بعد سن رائزرس حیدرآباد نے لیگ مرحلے کا اختتام 18 پوائنٹس کے ساتھ کیا، لیکن بہتر نیٹ رن ریٹ کی بنیاد پر گجرات ٹائٹنس اور رائل چیلنجرس بنگلورو سرفہرست دو مقامات پر رہے۔
سن رائزرس کو ٹاپ-2 میں پہنچنے کیلئے آر سی بی کو 166 رن سے کم اسکور پر روکنا ضروری تھا۔
کمنس نے کہا کہ ٹیم نے بھرپور کوشش کی، لیکن حیدرآباد کی بیٹنگ کیلئے سازگار وکٹ پر آر سی بی کو اتنے کم اسکور پر روکنا آسان نہیں تھا۔
انہوں نے کہا، ’’یہ اچھی وکٹ تھی اور ہمیں معلوم تھا کہ بہت سی چیزوں کا ہمارے حق میں جانا ضروری ہے۔ ہم قریب پہنچے، لیکن پھر بھی یہ ایک بڑی جیت رہی۔‘‘
اب آر سی بی 26 مئی کو کوالیفائر-1 میں گجرات ٹائٹنس سے مقابلہ کرے گی، جبکہ سن رائزرس حیدرآباد 27 مئی کو ایلیمنیٹر میچ کھیلے گی۔
ایلیمنیٹر میں اس کا سامنا راجستھان رائلز، پنجاب کنگس یا کولکاتا نائٹ رائیڈرس میں سے کسی ایک ٹیم سے ہوگا، جو آخری پلے آف مقام کیلئے جدوجہد کر رہی ہیں۔