ستیشن کانگریس قانون ساز پارٹی کے لیڈر منتخب

نئی دہلی 14 مئی (یو این آئی) کیرالہ میں کانگریس کے سینئر لیڈر مسٹر وی ڈی ستیشن کو پارٹی قانون ساز پارٹی کا لیڈر قرار دیا گیا ہےکنگریس کی کیرالہ انچارج دیپا داس منشی نے جمعرات کو یہاں پارٹی ہیڈکوارٹر میں پریس کانفرنس میں بتایا کہ مسٹر ستیشن کو کیرالہ میں پارٹی قانون ساز پارٹی کا لیڈر بنایا گیا ہے اس موقع پر ان کے ساتھ کیرالہ کے لیے مقرر کردہ مرکزی مبصرین مسٹر اجے ماکن اور مسٹر مکل واسنک بھی موجود تھے۔ محترمہ داس منشی نے بتایا کہ گزشتہ سات مئی کو ترواننت پورم میں پارٹی قانون ساز پارٹی کی میٹنگ میں لیڈر منتخب کرنے کا اختیار پارٹی ہائی کمان کو دے دیا گیا تھا۔ اس کے بعد کانگریس صدر ملکارجن کھرگے نے کانگریس پارلیمانی پارٹی کی لیڈر سونیا گاندھی، لوک سبھا میں پارٹی لیڈر راہل گاندھی، مرکزی مبصرین، کیرالہ کے پارٹی اراکینِ پارلیمنٹ اور دیگر سینئر لیڈروں سے مشاورت کی۔ اس تمام عمل کے بعد مسٹر ستیشن کا نام قائدِ حزبِ اقتدار کے لیے طے کیا گیا ہے۔
قابلِ ذکر ہے کہ کیرالہ میں اسمبلی انتخابات میں کانگریس کی قیادت والے متحدہ جمہوری محاذ (یو ڈی ایف) کو 140 نشستوں میں سے 102 نشستوں کے ساتھ دو تہائی سے زیادہ اکثریت ملی ہے۔ پارٹی کو ریاست میں 10 سال کے بعد حکومت بنانے کا موقع ملا ہے۔ اس جیت میں مسٹر ستیشن کا اہم کردار رہا ہے۔ لیڈر کی دوڑ میں مسٹر رمیش چنیتھلا اور مسٹر کے سی وینوگوپال بھی شامل تھے۔