بنگال میں بی جے پی کی جیت پر کھنڈیلوال نے ’جھال موڑی‘ پارٹی کا اہتمام کیا

نئی دہلی، 05 مئی (یو این آئی) چاندنی چوک سے رکن پارلیمنٹ پروین کھنڈیلوال نے منگل کو یہاں "جھال موڑی پارٹی” کا اہتمام کر کے مغربی بنگال میں بھارتیہ جنتا پارٹی (بی جے پی) کو ملنے والی تاریخی جیت کا جشن منایا۔
اس موقع پر مسٹر کھنڈیلوال نے کہا کہ جھال موڑی اب محض ایک کھانے کی چیز نہیں رہی، بلکہ مغربی بنگال میں بی جے پی کی فتح کی علامت بن چکی ہے۔ انہوں نے کہا کہ جس جھال موڑی کا مذاق سابق وزیر اعلیٰ ممتا بنرجی نے اڑایا تھا، اسی جھال موڑی نے انہیں اقتدار سے اکھاڑ پھینک کر تاریخ رقم کر دی ہے۔ انہوں نے کہا کہ وزیر اعظم نریندر مودی کی مقامی مصنوعات کی حمایت کی پالیسی سب پر عیاں ہے۔ جب وزیر اعظم نے بنگال کی ایک عام دکان پر جھال موڑی کھائی، تو محترمہ بنرجی سمیت اپوزیشن جماعتوں نے اس کا مذاق اڑایا اور ان کی نقل اتاری۔
انہوں نے کہا کہ جھال موڑی مغربی بنگال کے ہر طبقے—غریب سے لے کر امیر تک—کے دل سے جڑی ہوئی ہے۔ ایسے میں اس کی توہین کرنا دراصل بنگال کے عوام کے جذبات کی توہین تھی، جس کا جواب عوام نے جمہوری طریقے سے دے دیا ہے۔
مسٹر کھنڈیلوال نے کہا کہ یہ عوامی مینڈیٹ مسٹر مودی کی قیادت میں عوام کے اٹوٹ یقین کا ثبوت ہے اور یہ اپوزیشن کی منفی، گمراہ کن اور تفرقہ انگیز سیاست کو مکمل طور پر مسترد کرنے کا واضح پیغام ہے۔ انہوں نے انتخابی نتائج کے حوالے سے محترمہ بنرجی اور اپوزیشن لیڈروں کے بیانات پر کہا کہ یہ ان کی سیاسی مایوسی اور اپنی ہار کی ذمہ داری سے بچنے کی ایک ناکام کوشش ہے۔ انہوں نے کہا کہ مغربی بنگال سمیت دیگر ریاستوں میں بی جے پی کی جیت وزیر اعظم نریندر مودی کی انتھک محنت، دور اندیش قیادت اور وزیر داخلہ امت شاہ کی درست حکمت عملی کا نتیجہ ہے۔
مسٹر کھنڈیلوال نے کہا کہ بی جے پی حکومت عوام کی توقعات پر پورا اترنے کے لیے مکمل عزم کے ساتھ کام کرے گی اور "سب کا ساتھ، سب کا وکاس، سب کا وشواس” کے منتر کو مزید مضبوط بنائے گی۔