نئی دہلی یکم مئی (یواین آئی ) صدر جمہوریہ اور تینوں افواج کی سپریم کمانڈر دروپدی مرمو نے جمعہ کو یہاں آرمی ٹریننگ کمان (اے آر ٹی آر اے سی)، شملہ کے ہیڈ کوارٹر کا دورہ کیا اور قوم کو محفوظ اور بااختیار بنانے کے مقصد سے تربیت سے متعلق موضوعات پر تبادلہ خیال کیا۔
اے آر ٹی آر اے سی پہنچنے پر ہماچل پردیش کے گورنر کویندر گپتا اور اے آر ٹی آر اے سی کے جنرل آفیسر کمانڈنگ ان چیف لیفٹیننٹ جنرل دیویندر شرما نے ان کا استقبال کیا۔ صدر کو جی او سی ان سی کی طرف سے اے آر ٹی آر اے سی کی ترقی، فوجی اہلکاروں کو معیاری تربیت فراہم کر کے آپریشنل کارکردگی بڑھانے میں اس کے کلیدی کردار اور اے آر ٹی آر اے سی کے اہم اقدامات کے بارے میں معلومات دی گئی۔ اے آر ٹی آر اے سی کے جدید اقدامات کی تفصیل بتاتے ہوئے جی او سی ان سی نے ڈرون ٹریننگ کے فروغ، مخصوص ٹیکنالوجی کو اپنانے کے لیے اٹھائے گئے اقدامات، ‘ریڈ ٹیمنگ’ کے تصور کے آغاز اور فوج میں ڈیجیٹلائزیشن اور آٹومیشن کی سمت میں کی گئی کوششوں کا ذکر کیا۔ اے آر ٹی آر اے سی جنگ کے تصورات، فوج کے لیے وسائل کی ترقی اور دوست ممالک اور اتحادی افواج کے ساتھ وسیع اشتراک میں اہم کردار ادا کرتا ہے۔ یہ فوجی وقار، خود انحصاری اور ترقی یافتہ ہندوستان کی سمت میں ایک اہم کڑی ہے۔ اے آر ٹی آر اے سی اپنے 32 اہم تربیتی اداروں کے ذریعے ہندوستانی فوج میں پیشہ ورانہ نقطہ نظر کو مستحکم کرتا ہے، جس سے اسے جنگ کے فن اور سائنس کے تئیں ایک منفرد وژن ملتا ہے۔
صدرجمہوریہ نے ہماچل پردیش کے گورنر کویندر گپتا کی موجودگی میں لیفٹیننٹ جنرل دیویندر شرما کے ساتھ فوج میں تربیت سے متعلق موضوعات پر بھی تبادلہ خیال کیا، تاکہ قوم کو محفوظ اور بااختیار بنایا جا سکے۔ صدر نے اے آر ٹی آر اے سی کو فوج کی آپریشنل تیاریوں کو مزید مضبوط کرنے کے لیے مسلسل جوش اور لگن کے ساتھ کام کرتے رہنے کی ترغیب دی۔ انہوں نے اے آر ٹی آر اے سی کے تمام رینکوں اور دفاعی اہلکاروں کے شاندار کام کی تعریف کی اور انہیں مزید جوش و خروش اور لگن کے ساتھ کام جاری رکھنے کی اپیل کی۔
